Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 186 Hüküm no: 271 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ruznamçe-i evvel Yeğen Mustafa'ya ait Adalar nahiyesi Şeyhli köyündeki değirmenin oluğunu harabeden Mehmed ile Abdi'nin yakalanarak muhakeme edilmeleri Kıdvetü’n-nüvvâbi’l-müteşerri‘în Adalar nâibi efendi -zîde fazluhû- ve bi’l-fi‘il nâhiye-i merkūmda yeniçeri serdârı -zîde kadruhû- inhâ olunur ki, hâliyâ rikâb-ı hümâyûnunda rûznâmçe-i evvel sa‘âdetlü Yeğen el-Hâc Mustafa Efendi -zîde mecdühû-’nun Şeyhli nâm karyede vâki‘ çiftliği değirmeninin oluğunu nâhiye-i mezbûra tâbi‘ Dolayoba nâm karye sükkânından yeniçerilik iddi‘âsın eden Mehmed ve Abdi nâm kimesneler taş ile oluğunu doldurup değirmen mu‘attal olması iktizâ eyledikde taraf-ı şer‘den mürâsele ve zâbitleri ma‘rifetiyle da‘vet-i şer‘ olundukda merkūm Mehmed firâr ve mezbûr Abdi hânesinde mahfî olup şer‘-i şerîfe adem-i itâ‘atleri nümâyân olduğunu kādısı i‘lâm etmekle mezbûrân bi-eyyi hâlin ahz ve ele getirilip üzerlerine ba‘de’s-sübût hüküm hüccetleriyle mübâşirîne teslîm ve bu cânibe ihzârları içün işbu mektûb tahrîr, kıdvetü’l-emâsil ve’l-akrân otuz altı bölük Mustafa Çavuş ta‘yîn ve irsâl kılındı, vusûlünde gerektirki vech-i meşrûh üzere zâbiti ma‘rifetiyle merkūm Mehmed ve Abdi nâm yoldaşları bulundukları mahâlde ahz ve bu cânibe üzerlerine sübût bulan mevâdları hüccet-i şer‘iye olunup hüccet-i şer‘iyesiyle mübâşir-i merkūma teslîm ve bu cânibe ihzâr ve irsâl edip hilâf-ı şer‘-i şerîf kimesneye zulm ü ta‘addî eylemeyip mûceb-i mektûb ile amel eyleyesiz. Tahrîren fî-evâhiri şehri Şa‘bâni’l-mu‘azzam sene selâse ve ışrîn ve mi'e ve elf. Fî-sene 1124 El-Fakīr İsmail ser-sekbân-ı âlî kāimmakām-ı yeniçeriyân-ı Dergâh-ı âlî hâlâ.