Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 514 Hüküm no: 536 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Börekçi Hacı Hüseyin b. Kemal’in bazı ev eşyaları ile börekçi dükkanındaki tüm aletlerini kızı Hadice’ye hibe ettiği Börekçi tâifesinden olup mahmiye-i İstanbul’da Sofular mahallesinde sâkin el-Hâc Hüseyin b. Kemal nâm kimesne meclis-i şer‘-i hatîr-i lâzimü’t-tevkīrde sulbiye kebîre kızı işbu bâ‘isetü’l-vesîka Hadice nâm hâtun tarafından husûs-ı âti’z-zikri tasdîka vekîl olup nehc-i şer‘î ve tarîk-ı mu‘teber-i mer‘î üzere şer‘an vekâleti sâbite olan zahrü’l-emsâl Süleyman Çelebi b. Mehmed mahzarında bi-tav‘ihî ikrâr ve i‘tirâf edip silk-i mülkümde münselik olan eşyâmdan otuz aded sagīr ve kebîr sahan ve bir kebîr kazgan ve üç su güğümü ve iki tâbe ve üç baklava tepsisi ve altı aded yorgan ve altı minder ve dört kumaş yasdık ve biri mâ’î ve biri kırmızı iki kilim ve iki Yanbolu kebesi ve üç mâ’î velense ve iki beledî döşek ve on yemeni yasdık ve bir orta keçesi ve bir kaliçe ve beş yan keçemi ve Sofular Çarşısı’nda vâki‘ börekçi dükkânımda mevcûd mülküm olan on beş aded bakır uzun börek tâbesini ve otuz beş değirmi bakır kuzu tepsisi ve dört tas ve bir güğüm ve dükkânda mevcûd olup sâir cemî‘ börekçi âlâtımı kızım müvekkile-i mezbûre Hadice’ye hibe-i sahîha-i şer‘iyye ile hibe ve teslîm ve temlîk ol dahi meclis-i hibede ittihâb ve tesellüm ve temellük eyledi ba‘de’l-yevm eşyâ-i mezbûre kızım müvekkile-i mezbûre Hadice’nin mülk-ı mevhûbu olmuşdur benim hak ve alâkam ve medhalim kalmadı keyfemâ teşâ ve tahtâr mutasarrıfe olsun dedikde mukırr-ı mezbûrun vech-i muharrer üzere sudûr eder kelimâtını vekîl-i mezbûr bi’l-müvâcehe tasdîk ve bi’l-müşâfehe tahkīk etmeğin mâ-hüve’l-vâki‘ bi’t-taleb ketb olundu. Fi’l-yevmi’l-hâmis a‘şâr min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Lütfullah Efendi el-imâm, Mehmed Çelebi el-müezzin, el-Hâc Ebûbekir Ağa, Muharrem Çelebi b. Mahmud, Bekir Efendi b. Yusuf, Mahmud Ağa b. Ali mütevellî-i Haremeyn-i şerîfeyn, Mehmed Beşe b. Pîr Nefes, Bâli Çelebi b. İbrahim, Bekir Çelebi b. Osman ve gayruhüm.