Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 515 Hüküm no: 537 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi b. Bayezid’in alacak davasında Abdullah b. Abdülcelil ile iki yüz elli guruşa sulh olduğu Mahrûse-i Galata mahallâtından Firuz Ağa mahallesinde sâkin Hasan Çelebi b. Bayezid nâm kimesne tarafından husûs-ı âti’l-beyânı da‘vâ ve talebe ve lâzım gelirse sulh ve ibrâya vekîl olup mahalle-i mezbûre sükkânından Mehmed Bey b. Abdullah ve el-Hâc Mehmed b. Ali nâm kimesneler şehâdetleri ile şer‘an vekâleti sâbite olan Mehmed Efendi b. Ali el-imâm meclis-i şer‘-i hatîr-i lâzimü’t-tevkīrde işbu bâ‘isü’l-kitâb Abdullah b. Abdülcelil nâm kimesne mahzarında tav‘an ikrâr ve takrîr-i kelâm edip müvekkilim mezbûr Hasan Çelebi’nin merkūm Abdullah zimmetinde cihet-i deyn-i şer‘îden beş yüz kırk kıt‘a riyâlî guruş hakkı olup meblağ-ı mezbûru bundan akdem bi’l-vekâle mezbûr Abdullah’dan da‘vâ ve taleb eylediğimde beynimizde münâza‘ât-ı kesîre vâkı‘a olmuşidi el-hâletü hâzihî beynimize muslihûn tavassut edip merkūm Abdullah ile beni da‘vâ-yı mezbûreden iki yüz elli kıt‘a riyâlî guruş üzerine sulh eylediklerinde ben dahi vekâletim hasebiyle sulh-ı mezbûru kabûl ve bedel-i sulh olan meblağ-ı mezbûr iki yüz elli kıt‘a riyâlî guruşu bi’t-tamâm ve’l-kemal mezbûr Abdullah yedinden ahz u kabz edip mâ‘adâ da‘vâsından mezbûr Abdullah’ın zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim ba‘de’l-yevm benden yâ müvekkilim mezbûr Hasan Çelebi’den husûs-ı mezbûra müte‘allika mezbûr Abdullah üzerine da‘vâ sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fi’l-yevmi’s-sâdis aşer min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Mustafa Bey b. Osman, el-Hâc Sefer b. Mehmed, Yusuf Bey b. Abdullah, Osman Bey b. İbrahim, İbrahim Bey b. Ali ve gayruhüm mine’l-[hâzırîn.]