Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 516 Hüküm no: 538 Orijinal metin no: [78a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Varnak’ın Bağdasar v. Toros’ta olan alacağını varisleri Agop, Avanos ve Karabet tahsil ettikten sonra tekrar faiz talebinde bulunmalarının meşru olmadığı Dâru’s-saltanati’s-seniyye mahmiye-i Kostantıniyye mahallâtından ( ) mahalle[sinde] sâkin iken bundan akdem hâlik olan Varnak v. Asar nâm Ermeni’nin sulbî sagīr oğulları Agop ve Avanos ve Karabet’in tesviye-i emrlerine kıbel-i şer‘-i kavîmden mansûb vasîleri olan Arakil v. Gazal nâm Ermeni meclis-i şer‘-i hatîr-i lâzimü’t-tevkīrde işbu bâ‘isü’l-vesîka Bağdasar v. Toros nâm Ermeni muvâcehesinde üzerine takrîr-i da‘vâ edip hâlik-i mezkûr Varnak hâl-i hayâtında mezkûr Arakil’e yirmi dört kıt‘a riyâlî guruş, altı guruş fâide vermek üzere ikrâz ve teslîm edip ol dahi istikrâz ve kabz eyledikden sonra kable’l-ahz hâlik olup zimmetinde kalmışidi hâlâ meblağ-ı mezkûr yirmi dört kıt‘a riyâlî guruşu bi-hükmi’l-vesâye mezkûr Bağdasar yedinden vekâletden sıgār-ı mezkûr için ahz u kabz eyledim hâlâ suâl olunup altı guruş fâidesinin dahi alıverilmesin taleb ederim dedikde vasiyy-i mezkûr [Arakil v.] Gazal’in da‘vâsı da‘vâ-yı şer‘iyye olmamağın bî vech mu‘ârazadan men‘ olunup mâ-hüve’l-vâki‘ kayd şüd. Fi’l-yevmi’s-sâdis aşer min-Zilhicceti’ş-şerîfe li-sene 1067. Şühûdü’l-hâl: Mustafa Efendi el-kâtib, Osman Beşe çukadâr, İsa Bey b. Ahmed, Piyale Bey b. Abdullah, el-Hâc Ca‘fer b. Abdullah ve gayruhüm mine’l-[hâzırîn.]