Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 516 Hüküm no: 539 Orijinal metin no: [78a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Ali’nin alacağına kefaletinden dolayı Bozacı Hüseyin Beşe b. Abdullah’tan on bin akçe alacağı olduğu Mahmiye-i İstanbul hısnı ebvâbından Cebealikapı dâhilinde Seferikoz mahallesi sükkânından işbu bâ‘isü’l-vesîka Mehmed Çelebi b. Ali nâm râcil meclis-i şer‘-i hatîr-i lâzimü’t-tevkīrde bozacı tâifesinden Hüseyin Beşe b. Abdullah nâm kimesne mahzarında üzerine da‘vâ ve takrîr-i kelâm edip gāib ani’l-meclis olup mezbûr Hüseyin Beşe’nin bozacılık san‘atında şerîki olan Küçük Hüseyin b. Abdullah nâm kimesneye bin altmış üç senesi Cumâdelûlâsı gurresinde malımdan on bin akçe ikrâz ve teslîm ol dahi yedimden iktirâz ve tesellüm eyledikden sonra meblağ-ı mezbûr on bin akçe işbu Hüseyin Beşe emr ve kabûlü hâviye kefâletle kefîl olmağla meblağ-ı mezbûru hâlâ kefâleti hasebiyle mezbûr Hüseyin Beşe’den taleb ederim suâl olunsun dedikde gıbbe’s-suâl mezbûr Hüseyin Beşe cevâbında fi’l-hakīka müdde‘î-i mezbûr şerîkim gāib-i merkūm Küçük Hüseyin’e meblağ-ı mezbûr on bin [akçe] ikrâz ve teslîm ol dahi ba‘de’l-iktirâz ve’t-tesellüm meblağ-ı mezbûra târih-i merkūmdan ben emr ve kabûlü hâviye kefâletle kefîl olmuşidim lâkin mezbûr Küçük Hüseyin müdde‘î-i merkūma deyni olan meblağ-ı mezbûr on bin akçeyi tamâmen edâ ve teslîm eylemekle kefâlet-i mezbûreden zimmetim beri olmuşdur deyu def‘le mukābile edicek akībe’l-istintâk mezbûr Hüseyin Beşe’den def‘-i mezbûrunu mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka müdde‘î-i mezbûr Mehmed Çelebi’ye gāib-i mezbûr Küçük Hüseyin zimmetinde cihet-i karz-ı şer‘îden olan meblağ-ı mezbûr on bin akçe hakkını merkūm Küçük Hüseyin’den küllen ve bazen ahz u kabz etmediğine yemîn teklîf olundukda ol dahi hasbe’l-mes’ûl yemîn billâhi’l-aliyyi’l-azîm etmeğin mûcibiyle mezbûr on bin akçeyi kefâleti hasebiyle müdde‘î-i mezbûr Mehmed Çelebi’ye edâ ve teslîme mezbûr Hüseyin Beşe’ye tenbîh olunup mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe li-sene 1067. Şühûdü’l-hâl: Ali Beşe b. Mustafa, Ali Beşe b. Receb çukadâr, Osman Beşe çukadâr, İsa Bey b. Ahmed ve gayruhüm.