Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 517 Hüküm no: 540 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Papa Kalvine v. Miho’nun Abdi Subaşı mahallesindeki mülk menzilini Terzi Panbuk v. Kostantin ile karısı Laskarina bt. Veyni’ye sattığı Fi’l-asl Vilâyet-i Rumeli’nde Kalavrita kazâsına tâbi‘ Savanos nâm karye sükkânından olup hâlâ medîne-i Ebî Eyyûb-i Ensârî -radıya anhû rabbühû’l-bârî- muzâfâtından Hasköy demekle ma‘rûf kasabada sâkin olan Papa Kalvine v. Miho nâm râhib meclis-i şer‘-i hâtîr-i lâzimü’t-tevkīrde hayyât tâifesinden olup kendi tarafından asîl ve zevcesi Laskarina bt. Veyni nâm Nasrâniye tarafından ikrâr-ı âti’l-beyânı tasdîka vekîl olduğu bi-mâ-hüve nehcü’s-sübût şer‘an sâbit olan işbu hâmilü’s-sifr Panbuk v. Kostantin nâm zimmî muvâcehesinde tav‘an ikrâr ve i‘tirâf işbu akdin sudûruna değin silk-i mülk-i sahîhimde münselik olup mahmiye-i İstanbul hısnı ebvâbından Fenerkapısı hâricinde Abdi Subaşı mahallesinde vâki‘ bir tarafdan Yazıcı Habib mülkü ve iki tarafdan cidâr-ı hısn ve bir tarafdan tarîk-ı âm ile mahdûd olup iki bâb fevkānî ve bir bâb tahtânî oda ve bir tahta-pûş ve bir kenîf ve bir su kuyusunu müştemil mülk menzilimi cemî‘ tevâbi‘ ve levâhıkı ve kâffe-i hukūk ve merâfıkı ile bi’l-iştirâki’s-seviyye mezbûrâna tarafeynden îcâb ve kabûlü hâvî bey‘-i bâtt-ı sahîh-i şer‘î ile iki yüz on altı kıt‘a riyâlî guruşa bey‘ ve teslîm edip onlar dahi vech-i muharrer üzere iştirâ ve kabûl ve tesellüm eylediklerinden sonra semeni olan meblağ-ı mezbûrun elli kıt‘a riyâlî guruşunu mezbûrân işbu hâzır bi’l-meclis Palaloga v. Andreya nâm zimmîden havâle-i sahîha-i şer‘iyye ile havâle edip biz dahi kabûl eylediğimizden sonra meblağ-ı bâkī yüz altmış altı kıt‘a riyâlî guruşu mezbûrânın yedlerinden tamâmen ahz u kabz eyledim min ba‘d cemî‘ menzil-i mahdûd-ı mezbûr mesfûrân Laskarina ve Panbuk’un mülk-i müşterâlarıdır benim alâka ve medhalim yokdur keyfe mâ yeşâ ve yahtâr mutasarrıf olsunlar dedikde mukırr-ı merkūmu ikrâr-ı meşrûhunda mezbûr Panbuk bi’l-asâle ve bi’l-vekâle tasdîk etmeğin mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Mustafa b. Abdullah el-hallâk, İbrahim Beşe b. Abdullah, Mustafa Efendi b. Muharrem el-kâtib, Osman Beşe çukadâr ve gayruhüm mine’l-[hâzırîn.]