Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 518 Hüküm no: 541 Orijinal metin no: [78b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülazar bt. Abdullah ile kızı Rabia’nın Rus asıllı cariyeleri Mülâyim’i azat ettikleri Mahmiye-i İstanbul’da Haydar Paşa mahallesi sükkânından iken bundan akdem vefât eden İsmail Beşe b. Derviş’in verâseti zevce-i metrûkesi Gülazar Hâtun bt. Abdullah ile sulbiye kebîre kızı Râbia’ya münhasıra olduğu şer‘an mütehakkık oldukdan sonra mezbûre Gülazar Hâtun asâleten ve mezbûre Râbia tarafından husûs-ı âti’z-zikri ikrâra vekîl olup vekâleti zât-ı mezbûreyi ma‘rifet-i şer‘iyye ile ârifân olan Mehmed Beşe b. Ali ve İbrahim Bey b. Ömer nâm kimesneler şehâdetleriyle şer‘an sâbite olan Haydar Beşe b. Sefer vekâleten meclis-i şer‘-i hatîr-i lâzimü’t-tevkīrde herbiri takrîr-i kelâm edip müteveffâ-yı mezbûrun silk-i mülkünde olan işbu orta boylu açık kaşlı elâ gözlü Rusiyyetü’l-asl Mülâyim bt. Abdullah ba‘de vefâtihî irs-i şer‘î ile bana ve müvekkile-i merkūmeye isâbet ve intikāl eylemişidi el-hâletü hâzihî mezbûre Mülâyim’i asâleten ve vekâleten tahrîr ve i‘tâk ve sâir harâir-i asliyyât gibi hürre olup üzerinde [hakk-ı] velâdan gayrı gerek benim ve gerek müvekkile-i mezbûrenin hak ve alâkası kalmadı dedikde vâki‘u’l-hâl ketb olundu. Fi’l-yevmi’r-râbi‘ aşer min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Mehmed Efendi b. ( ) el-imâm, İsmail Halîfe b. ( ) el-müezzin, Ali Beşe b. Nuh, el-Hâc Şa‘ban Bey b. ( ) el-yesârî, Mustafa Çelebi b. Abdi Efendi.