Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 530 Hüküm no: 557 Orijinal metin no: [81a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi’nin kızları Sâliha ve Fatma’nın babalarından kendilerine intikal eden vakıf odaya müdahalede bulunduğu iddiasıyla Ali Çelebi aleyhine açtıkları davada haksız oldukları Fazîletlü efendi hazretlerinin imzâsıyladır. Mahmiye-i İstanbul’da Hobyar mahallesi sâkinelerinden Sâliha ve Fâtıma bintey Hasan Çelebi nâm hâtunlar meclis-i şer‘-i hatîr-i lâzimü’t-tevkīrde merhûm Cerrâh Mehmed Paşa Evkāfı’ndan zikri âtî vakıf odaya vâzı‘u’l-yed olduğu şer‘an sâbit olan Ali Çelebi b. ( ) mahzarında ve vakf-ı mezbûrun câbîsi olup hâlâ mütevellîsi olan ( ) tarafından vekîl-i sâbitü’l-vekâle olan Mahmud b. Şa‘ban muvâcehesinde merkūm Ali Çelebi üzerine herbiri da‘vâ ve takrîr-i kelâm edip vakf-ı mezbûrdan Topaklı Mehmed Çavuş Odaları demekle ma‘rûf müte’ehhilîn odalarından bir tarafdan Mehmed Çavuş odası ve bir tarafdan Aynî Hâtun odası ve bir tarafdan Mustafa Çelebi b. Mehmed Çavuş odası ve bir tarafdan tarîk-ı âmma müntehî olup bir bâb tahtânî odayı ve havluyu ve kenîfi müştemil olan cemî‘ vakıf oda icâre-i mu‘accele ve müeccele-i ma‘lûmeteyn ile ile’l-vefât babamız mezbûr Hasan Çelebi b. İbrahim’in taht-ı tasarrufunda olup fevt oldukda intikāl-i âdî ile ikimize intikāl etmişiken merkūm Ali Çelebi bi-gayrı hakkın vaz‘-ı yed eylemişdir suâl olunup kasr-ı yedine tenbîh olunması matlûbumuzdur dediklerinde gıbbe’s-suâl merkūm Ali Çelebi cevâbında fil-hakīka oda-yı mezkûra müdde‘iyetân-ı mezbûretânın babaları mezbûr Hasan Çelebi’nin ma‘rifet-i mütevellî ile icâre-i mu‘accele ve müeccele-i ma‘lûmeteyn ile taht-ı tasarrufunda olup fevt oldukda intikāl-i âdî ile kızları mezbûretâna intikāl etmişidi lâkin oda-i mezkûre harâba müşrif olup sagīretân-ı mezbûretânın ta‘mîrine kudretleri olmadığından mâ‘adâ zarûret-i nafakaları olduğu ecilden vâlideleri savb-ı şer‘den mansûbe vasîleri olan işbu hâzıratü bi’l-meclis Emine bt. İbrahim nâm hâtun zikrolunan odayı izn-i şer‘le beyne’t-tâlibîn müzâyede edip altı yüz akçede gāibe ani’l-meclis Râziye bt. Abdullah nâm hâtun üzerinde karâr edip ziyâde ile tâlib-i âhar olmamağla merkūme Emine Hâtun mârrü’z-zikr vakıf odayı bi’l-vesâye meblağ-ı mezbûr altı yüz akçe bedel mukābilesinde merkūme Râziye’ye ma‘rifet-i mütevellî-i vakf-ı mezbûr ile ferâğ ve tefvîz ve teslîm edip ol dahi tefevvüz ve kabûl ve tesellüm ve bedel-i mezkûru yedinden bi’l-vesâye ahz u kabz ettikden sonra oda-yı mezkûr tedâvül-i eyâdî ile ma‘rifet-i mütevellî-i vakf-ı mezbûr ile taht-ı yedime dâhil olmuşdur hatta hâl minvâl-i muharrer üzere olduğuna hüccet-i şer‘iyye dahi vardır deyu bin elli dört senesi Cumâdelûlâsı’nın yirmi sekizinci günü tarihiyle müverraha ve mahmiye-i mezbûrede hilâfeten müvellâ olan Mevlana Ahmed Efendi b. Mehmed imzâsıyla mümzât ve hatemi ile mahtûme ve mazmûnu takrîrine muvâfık hüccet-i şer‘iyye ibrâz edip merkūmetân Sâliha ve Fâtıma muvâcehelerinde feth u kırâat ve istintâk olundukda cevâblarında her biri mazmûn-ı hüccet-i merkūmeyi tav‘an mu‘terife olduklarında merkūmetân Sâliha ve Fâtıma mu‘ârazadan men‘ olunup mâ-vaka‘a bi’t-taleb ketb olundu. Tahrîren fi’l-yevmi’s-sâmin aşer min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Umdetü’l-kuzât Mehmed Efendi b. Veli Efendi, Ramazan Efendi b. İbrahim, Halil Beşe b. Abdullah, Üveys Çelebi b. Abdullah, Osman Beşe çukadâr ve gayruhüm mine’l-[hâzırîn.]