Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 531 Hüküm no: 558 Orijinal metin no: [81a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Murat, Hararos ve Andriyas kardeşlerin Eğin’deki mülk bahçelerini Ramazan Bey b. Sefer’e sattıkları Vilâyet-i Anadolu’da Eğin kazâsına tâbi‘ Vank nâm karye sükkânından olup ekmekçi tâifesinden Marat ve Hararos ve Andriyas evlâd-ı Erşad nâm Ermeniler meclis-i şer‘-i hatîrde karye-i mezbûrede sâkin işbu bâ‘isü’l-vesîka Ramazan Bey b. Sefer tarafından husûs-ı âti’z-zikri tasdîka vekîl olup nehc-i şer‘î üzere şer‘an vekâleti sâbite olan Arıcan v. Bağdasar nâm Ermeni muvâcehesinde herbiri ikrâr ve i‘tirâf edip silk-i mülkümüzde olup babamız mezbûr Erşad’dan müntakil karye-i mezbûrede vâki‘ bir tarafı Süleyman Çelebi bağına ve bir tarafı mezbûr Marat mülküne ve bir tarafı tarîk-ı âmma ve bir tarafı su arkına müntehî bir kıt‘a mülk bahçe bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz yirmi riyâlî guruşa müvekkil-i mezbûr Ramazan Bey’e bey‘ ve teslîm ol dahi vech-i muharrer üzere iştirâ ve kabûl eyledikden sonra semeni olan meblağ-ı mezbûr yüz yirmi riyâlî guruşu tamâmen vekîl-i mezbûr Arıcan yedinden ahz u kabz edip bağ-ı mahdûd-ı mezbûru mahallinde kabz ve tasarrufu mezbûr [81b] Ramazan Bey’i taslît eyledik ba‘de’l-yevm zikir oluna bağ-ı mezbûr Ramazan Bey’in mülk-i müşterâsıdır bizim asla alâka ve medhalimiz kalmadı dediklerinde gıbbe’t-tasdîkı’ş-şer‘î’l-mu‘teber mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Zilhicceti’ş-şerîfe li-sene 1067. Şühûdü’l-hâl: Mustafa b. Nasûh, Ahmed b. Murad Beşe, Mehmed Bey b. Sefer, Osman Beşe çukadâr, İsa Bey b. Ahmed ve gayruhüm.