Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 532 Hüküm no: 559 Orijinal metin no: [81b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe’nin satın aldığı cariye bedelinden Esirci Abdünnebi b. Mustafa’ya on beş guruş borcu olduğu Mahmiye-i İstanbul’da Tercüman Yunus mahallesi sükkânından bâ‘isü’l-vesîka İbrahim Beşe b. ( ) nâm râcil mahfil-i kazâda esirci tâifesinden Abdünnebî b. Mustafa mahzarında üzerine da‘vâ ve takrîr-i kelâm edip silk-i mülkümde olan uzun boylu masrû‘a Rusiyyetü’l-asl Mülâyim nâm bir câriyemi bundan akdem elli riyâlî guruşa mezbûr Abdünnebi’ye bâtten bey‘ ve teslîm ol dahi yedimden iştirâ ve tesellüm eyleyip semen-i mezbûrdan iki guruşunu ahz u kabz edip bâkī zimmetinde semen-i mezbûrdan kırk sekiz guruş hakkım vardır hâlâ taleb ederim suâl olunsun dedikde gıbbe’s-suâl mezbûr Abdünnebi cevâbında fi’l-hakīka bundan akdem müdde‘î-i mezbûr yedinden mülkü olan câriye-i mevsûfe-i mezbûreyi semen-i mezbûr elli riyâlî guruşa iştirâ ve semen-i mezbûrun iki guruşunu edâ ve teslîm ve bâkī zimmetimde semen-i mezbûrdan müdde‘î-i mezbûra kırk sekiz guruş deynim vardır deyu bi-tav‘ihî ikrâr edip lâkin ben dahi târih-i kitâbdan üç gün mukaddem mülküm olan orta boylu bir re’s Arab câriyemi gāib ani’l-meclis Sefer Beşe b. ( ) yediyle müdde‘î-i mezbûra altmış beş riyâlî guruşa bâtten bey‘ ve teslîm edip ol dahi ba‘de’l-iştirâ ve’t-tesellüm semen-i mezbûrun mezbûr Sefer Beşe yedinden iki riyâlî guruşunu ahz u kabz edip bâkī müdde‘î-i mezbûr zimmetinde benim dahi altmış üç riyâlî guruş hakkım vardır deyicek gıbbe’l-istintâk mezbûr İbrahim Beşe husûs-ı mezbûru bi-tav‘ihî ikrâr ve i‘tirâf etmeğin mûcibiyle mezbûr İbrahim Beşe zimmetinde olan semen-i mezbûr altmış üç riyâlî guruşun kırk sekiz guruşu mezbûr İbrahim Beşe’nin merkūm Abdünnebi zimmetinde olan kırk sekiz riyâlî guruşa takās olundukdan sonra mâ‘adâ olan on beş guruşu mezbûr Abdünnebi’ye edâ ve teslîme mezbûr İbrahim Beşe’ye tenbîh olunup mâ-vaka‘a ketb olundu. Fi’l-yevmi’l-ışrîn min-Zilhicceti’ş-şerîfe sene 1067. Şühûdü’l-hâl: Hüseyin Çavuş b. Ahmed, Ahmed Efendi b. Abdülmü’min el-imâm, Seyyid Mehmed b. Seyyid ez-Zâkir, Ramazan Ağa b. ( ) el-cündi, Ali Çavuş b. ( ), Abdullah Efendi b. ( ), Osman Beşe b. Sevindik çukadâr.