Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 544 Hüküm no: 572 Orijinal metin no: [83b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cariye alışverişi hususunda Şerife Fatma Hatun, Yusuf Beşe ve Mustafa Beşe’nin birbirlerinin zimmetlerini ibra ettikleri Mahmiye-i İstanbul’da Darbhâne kurbünde Bakla Hanı demekle ma‘rûf odalarda sâkin olup esirci tâifesinden olan es-Seyyid Mehmed Çelebi b. es-Seyyid Hamza meclis-i şer‘de mahrûse-i Bursa sâkinelerinden Şerîfe Fâtıma bt. ( ) nâm hâtuna mülk ve hakkı olan orta boylu Rusiyyetü’l-asl Dilaver bt. Abdullah nâm câriye-i memlûkesini tarafeynden îcâb ve kabûlü hâvî bey‘-i bât ile yüz seksen beş riyâlî guruşa bey‘ ve teslîm ol dahi ba‘de’l-iştirâ ve’t-tesellüm esirci dellâlı olup mahmiye-i mezbûrede Nuri Dede mahallesinde sâkin Yusuf Beşe b. Mirzâ’ya câriye-i mevsûfe-i mezbûreyi meblağ-ı mezbûr yüz seksen beş riyâlî guruşa bâtten bey‘ ve teslîm ol dahi ba‘de’l-iştirâ ve’t-tesellüm semen-i merkūmdan on riyâlî guruşunu merkūme Şerîfe Fâtıma’nın emri ile câriye-i mezkûre semeninden mezkûr Seyyid Mehmed Çelebiye deyni olan yüz seksen beş guruşdan on riyâlî guruşu için meclis-i şer‘de teslîm edip ol dahi ba‘de’l-kabz merkūm Yusuf Beşe’nin câriye-i mezbûre semeninden merkūme Fâtıma’ya yüz yetmiş beş guruş deyni kaldı meblağ-ı bâkī-i mezkûrdan yüz beş riyâlî guruşu yine mezbûr Yusuf Beşe vesâtetiyle Üsküdar’da Solak Sinan mahallesi sükkânından Mustafa Beşe b. Halil’den iştirâ ve kabz eylediği Rusiyyetü’l-asl Acemi câriye semeninden zimmetinde deyn olan yüz beş guruş için mezbûr Mustafa Beşe’ye edâ ve teslîme emr edip meblağ-ı bâkī yetmiş guruşunu dahi merkūm Seyyid Mehmed Çelebi’den semen-i mezkûr yüz seksen beş guruşa iştirâ ve kabz ettiği câriye-i mezkûre semeninden zimmetinde bâkī kalan yüz yetmiş beş riyâlî guruşdan yetmiş riyâlî guruş mukābilesinde teslîme emr etmekle merkūm Yusuf Beşe dahi mezbûre Fâtıma’nın emri ile üzerinde meblağ-ı bâkī yüz yetmiş beş guruşun yetmişini Seyyid Mehmed Çelebi’ye ve yüz beş guruşunu mezkûr Mustafa Beşe’ye def‘ ve teslîme ta‘ahhüd ve mezbûrân dahi kabûl ettiklerinden sonra mezbûr Yusuf Beşe dahi câriye-i mevsûfe-i mezbûreyi merkūm Mustafa Beşe’ye meclis-i şer‘-i hatîrde yüz yetmiş beş riyâlî guruşa tarafeynden îcâb [ve] kabûlü hâvî bey‘-i bâtla bey‘ ve teslîm ol dahi iştirâ ve tesellüm ettikden sonra semen-i merkūm yüz yetmiş beş riyâlî guruşdan yüz beş guruşunu merkūme Şerîfe deyni için emri ile merkūm Mustafa Beşe’ye edâya müte‘ahhid olduğu yüz beş riyâlî guruşa takās edip ve mezbûr Seyyid Mehmed Çelebi’ye edâsını müte‘ahhid olduğu yetmiş riyâlî guruş deyn ile merkūm Seyyid Mehmed Çelebi’yi mezkûr Mustafa Beşe üzerine yedinden iştirâ ve kabz ettiği câriye semeninden zimmetinde kalan yetmiş riyâlî guruşa merkūmân Seyyid Mehmed Çelebi ve Mustafa Beşe’nin rızâlarıyla havâle-i sahîha-i şer‘iyye ile havâle edip merkūm Mustafa Beşe dahi havâle-i mezbûreyi kabûl ve meblağ-ı mezkûr yetmiş guruşu mezbûr Seyyid Mehmed Çelebi’ye edâya ta‘ahhüd ettikden [sonra] meblağ-ı mezbûr yetmiş guruşa tarafeynden emr ve kabûlü hâviye kefâlet-i sahîha-i şer‘iyye ile mezbûr Solak Sinan mahallesi [84a] sükkânından olan Mustafa Çavuş b. ( ) kefîl oldukdan sonra merkūme Şerîfe Fâtıma meclis-i şer‘-i hatîrde merkūm Seyyid Mehmed Çelebi’ye yedinden ve malından iştirâ ve kabz ettiği câriye-i mevsûfe-i mezbûre semeninden yüz beş riyâlî guruş lâzimü’l-edâ deyni olduğuna tav‘an ikrâr ve i‘tirâfından mâ‘adâ mezbûr Yusuf Beşe b. Mirzâ’nın zimmetini beynlerinde ilm-i şer‘î ile ma‘lûm câriye semenine müte‘allik âmme-i de‘âvâdan ibrâ-i âmm-ı kātı‘u’n-nizâ‘la ibrâ ve ıskāt edip merkūm Mustafa Beşe dahi merkūm Yusuf vesâtetiyle merkūme Şerîfe Fâtıma’ya bey‘ ve teslîm ettiği câriye semeninden zimmetinde deyni olan yüz beş guruşu tamâmen ahz u kabz ve husûs-ı mezbûra müte‘allik mezbûr Yusuf Beşe ve Şerîfe Fâtıma üzerlerine bi-vechin mine’l-vücûh da‘vâ ve hakkı kalmadığına tav‘an i‘tirâf ve tafsîl olunan minvâl üzere mezbûrûn Şerîfe Fâtıma ve Yusuf Beşe ve Mustafa Beşe’den herbirinin âhar üzerinde alâka ve hakları kalmamağın mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Zilhicceti’ş-şerîfe li-sene 1067. Şühûdü’l-hâl: Mehmed Efendi b. Veli Efendi, Mehmed Efendi eş-şehîr bi-Mü’minzâde, Ramazan Efendi b. İbrahim, Ali Efendi el-kâtib, Osman Beşe çukadâr ve gayruhüm.