Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 543 Hüküm no: 571 Orijinal metin no: [83b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karagöz v. Agop’un sattığı inek bedelinden Macar v. Vasil’de iki bin dört yüz akçe alacağı olduğu Mahmiye-i İstanbul’da Mustafa Paşa mahallesi sakinlerinden işbu bâ‘isü’s-sifr Karagöz v. Agop nâm Ermeni meclis-i şer‘-i hatîr-i lâzimü’t-tevkīrde Macar v. Vasil nâm Ermeni muvâcehesinde üzerine da‘vâ ve takrîr-i kelâm edip târih-i kitâbdan üç buçuk ay mukaddem mezbûr Macar’a iki re’s karasığır ineğimi iki bin dört yüz akçeye bâtten bey‘ ve teslîm ol dahi yedimden iştirâ ve kabz eyleyip semen-i mezbûr iki bin dört yüz akçe zimmetinde kalmağın hâlâ taleb ederim suâl olunsun dedikde gıbbe’s-suâl mezbûr Macar cevâbında fi’l-hakīka târih-i mezbûrda müdde‘î-i mezbûr yedinden vech-i muharrer üzere semen-i mezbûr iki bin dört yüz akçeye iki re’s karasığır ineğini iştirâ ve kabz eyledim deyu bi-tav‘ihî ikrâr ve i‘tirâf edip lâkin semen-i mezbûru müdde‘î-i merkūm târih-i mezbûrdan yedi ay tamâmına değin bana te’cîl ve ben dahi kabûl eylemişidim deyu def‘le mukābile edicek akībe’l-istintâk ve’l-inkâr mezbûr Macar’dan def‘-i mezbûrunu mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīkat semen-i mezbûr iki bin dört yüz akçeyi târih-i mezbûrda vech-i muharrer üzere yedi ay tamâmına değin mezbûr Macar’a te’cîl etmediğine müdde‘î-i mezbûr Karagöz’e yemîn teklîf olundukda ol dahi hasbe’l-mes’ûl yemîn billâhi’l-lezî enzele’l-İncîle alâ İsa aleyhisselâm etmeğin mûcibiyle semen-i mezbûr iki bin dört yüz akçeyi hâlâ edâya mezbûr Macar’a tenbîh olunup mâ-vaka‘a kayd şüd. Fi’l-yevmi’s-sâlis ve’l-ışrîn min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Mustafa Beşe b. Abdullah, Veli b. Mustafa, Osman Beşe çukadâr, İbrahim b. Ömer ve gayruhüm mine’l-[hâzırîn.]