Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 542 Hüküm no: 570 Orijinal metin no: [83b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Receb’in alacağına kefil olan Mehmed Çelebi b. Mahmud’a parayı ödemesi için süre verildiği Mahmiye-i İstanbul’da Sultan Selim Câmi‘-i şerîfi kurbünde Çerâğî Hamza mahallesinde sâkin Ali Beşe b. Receb nâm kimesne meclis-i şer‘-i hatîrde Mehmed Çelebi b. Mahmud mahzarında ikrâr ve takrîr-i kelâm edip mahmiye-i mezbûre hısnı ebvâbından Topkapısı dâhilinde Ahmed Paşa mahallesinde sâkin olup muvakkaten Aydonat kādısı olan Ahmed Efendi b. İbrahim zimmetinde cihet-i karzdan elli kıt‘a riyâlî guruş ve yedimden müşterâ ve makbûz bir re’s doru at semeninden dahi elli riyâlî guruş ki cem‘an yüz kıt‘a riyâlî guruş hakkıma mezbûr Mehmed Çelebi ile hemşîrezâdesi diğer Mehmed Çelebi kefîl olmuşlar idi lâkin meblağ-ı mezbûru taleb eylediğimde hâlâ edâya iktidarları olmamağın istimhâl etmeğin meblağ-ı mezbûru târih-i kitâbdan kırk beş gün tamâmına değin te’cîl edip ol dahi ecel-i mezbûru kabûl eyledi dedikde gıbbe’t-tasdîkı’ş-şeri mâ-vaka‘a kayd şüd. Fi’l-yevmi’l-ışrîn min-Zilhicceti’ş-şerîfe li-sene 1067. Şühûdü’l-hâl: Rıdvan Efendi b. Hasan, Osman Beşe çukadâr, İbrahim Bey b. Ömer, Halil Bey b. Mustafa ve gayruhüm mine’l-[hâzırîn.]