Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 542 Hüküm no: 569 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Çelebi b. Ali’nin alacak hususunda Mehmed Beşe b. Ahmed’in zimmetini ibra ettiği Mahmiye-i İstanbul’da Nişancı Ca‘fer Çelebi mahallesi sâkinlerinden Yusuf Çelebi b. Ali meclis-i şer‘-i hatîr-i lâzimü’t-tevkīrde işbu bâ‘isü’r-rakīm Mehmed Beşe b. Ahmed nâm râcil mahzarında bi-tav‘ihî ikrâr ve i‘tirâf edip hâlâ medîne-i Belgrad’da sâkin Acem Yusuf Beşe nâm kimesne zimmetinde beynimizde ma‘lûm câriye semeninden iki yüz kıt‘a riyâlî guruş hakkım olup meblağ-ı mezbûru merkūm Yusuf Beşe’den da‘vâ ve taleb ve ahz u kabza ve bana îsâle tarafımdan bundan akdem mezbûr Mehmed Beşe’yi tevkîl ol dahi ba‘de kabûli’l-vekâle varıp medîne-i mezbûrede meblağ-ı mezbûr mukābilesinde merkūm Acem Yusuf Beşe’den doksan sekiz esedî guruş kıymetli bir yüklüklü üsküf ve bir sîm varsak ta‘bîr olunur kebîr bıçak ve bir sîm kılıç ve bir âl atlasa kaplı zerdava kürk ve altmış beş nakid esedî guruş alup kabz etmekle hâlâ eşyâ-i mezbûreyi bi-a‘yânihâ ve meblağ-ı mezbûr altmış beş esedî guruşu tamâmen bana mezbûr Mehmed Beşe’nin zimmetini ibrâ-i âm ile ibrâ ve ıskāt eyledim min ba‘d mezbûr Mehmed Beşe zimmetinde hak ve alâkam kalmadı dedikde gıbbe’t-tasdîkı’l-mu‘teber mâ-vaka‘a kayd şüd. Fi’l-yevmi’s-sâlis ve’l-ışrîn min-Zilhicceti’ş-şerîfe li-ese 1067. Şühûdü’l-hâl: Umdetü’l-müderrisîni’l-kirâm Yusuf Efendi, Ali Beşe b. Abdullah, Osman Beşe çukadâr, İbrahim b. Ömer.