Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 541 Hüküm no: 568 Orijinal metin no: [83a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zaharya v. Kirkor’un Katip Kasım mahallesindeki mülk evini İziz bt. Bali’ye yedi yüz elli guruşa sattığı Mahmiye-i İstanbul’da Şeyh Ferhad mahallesinde sâkin hulefâ-i neccârînden olan Zaharya v. Kirkor nâm Ermeni meclis-i şer‘-i şerîf-i lâzimü’t-teşrîfde İziz bt. Bâli nâm Ermeniye muvâcehesinde tav‘an ikrâr ve i‘tirâf işbu akdin sudûruna değin silk-i mülkümde münselik olup mahmiye-i mezbûrede Kâtib Kasım mahallesinde vâki‘ bir tarafdan mezbûre Eziz mülkü ve bir tarafdan İziz bt. Mardros mülkü ve bir tarafdan Safer nâm Ermeni mülkü ve bir tarafdan tarîk-ı âm ile mahdûd iki bâb fevkānî ve bir bâb tahtânî odaları ve havlu ve mezbûr İziz ile müşterek su kuyusunu ve kenîfi müştemil mülk menzilimi cemî‘ tevâbi‘ ve levâhıkı ve kâffe-i hukūk ve merâfıkı ile yedi yüz elli kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr İziz’e bey‘ ve teslîm edip ol dahi iştirâ ve tesellüm ve kabûl eyledikden sonra semeni olan meblağ-ı mezbûr yedi yüz elli kıt‘a riyâlî guruşu müşteriye-i mezbûre İziz yedinden tamâmen ahz u kabz eyledim min ba‘d cemî‘ menzil-i mahdûd-ı mezbûr merkūme İziz’in mülk-i müşterâsı ve hakk-ı sırfıdır benim alâka ve medhalim yokdur keyfemâ teşâ ve tahtâr mutasarrıfe olunsun dedikde mâ-vaka‘a kayd şüd. Fi’l-yevmi’s-sânî ve’l-ışrîn min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Osman Beşe çukadâr, Mehmed b. Abdullah, Abdünnebi b. İbrahim, Ali b. Abdullah, Ahmed b. Mehmed ve gayruhüm.