Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 540 Hüküm no: 567 Orijinal metin no: [83a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cafer Bey b. Mustafa’nın merhume Mahi Hatun’un varisi olduğunu tescil ettirmek için kendisinden rüşvet alan Beytülmal Emini Süleyman Ağa’nın zimmetini ibra ettiği Medine-i Ebî [Eyyûb-i] Ensârî radıye anhû rabbühû’l-bârî mahallâtından Hasan Paşa mahallesinde sâkine iken bundan akdem vefât eden Mâhî bt. ( ) nâm hâtunun verâseti zevc-i metrûkü Mehmed Beşe b. İlyas nâm kimesne ile zî-rahm cihetinden li-eb kız karındaşı oğlu Ca‘fer Bey b. Mustafa’ya münhasıra olduğu şer‘an müte‘ayyin oldukdan sonra mezbûr Ca‘fer Bey tarafından husûs-ı âti’l-beyâna vekîl olup vekâleti hüccet-i şer‘iyye ile şer‘an sâbite olan İsmail Efendi b. Ahmed meclis-i şer‘-i hatîr-i lâzimü’t-tevkīrde bi’l-fi‘il medîne-i mezbûrede emîn-i beytü’l-mâl ve Hazret-i Ebî [Eyyûb-i] Ensârî Vakfı mütevellîsi olan bâ‘isü’l-vesîka Süleyman Ağa b. el-merhûm Davud Paşa tarafından husûs-ı âti’z-zikrde husûmet ve redd-i cevâba vekîl olup vekâleti Mahmud Çelebi b. Abdi ve Ahmed Beşe b. Mehmed şehâdetleri ile şer‘an sâbite olan Mustafa Çelebi b. Hüseyin mahzarında üzerine bi’l-vekâle da‘vâ ve takrîr-i kelâm edip müvekkilim mezbûr Ca‘fer Bey mûrisesi mezbûre Mâhî Hâtun vefât eyledikde yanında bulunmağla müvekkil-i mezbûr Süleyman Ağa medîne-i mezbûrede emîn-i beytü’l-mal olmağın müteveffât-ı mezbûrenin zevci merkūmdan gayrı vâris-i ma‘rûfu olmamak zu‘muyla terekesinin nısf-ı şâyi‘ine vaz‘-ı yed eylediği terekeden kasr-ı yed edip müvekkilim mezbûra teslîm eylemek için müvekkilim mezbûrdan bî-tarîkı’r-rüşve sekiz bin akçe ahz u kabz eylemişdir hâlâ meblağ-ı mezbûru müvekkil-i mezbûr Süleyman Ağa’dan taleb ederim suâl olunsun dedikde gıbbe’s-suâl vekîl-i mezbûr Mustafa Çelebi cevâbında müvekkil-i mezbûr Süleyman Ağa husûs-ı mezbûr için ancak müvekkil-i mezbûr Ca‘fer Bey yedinden beş bin akçe ahz u kabz eyledikden sonra târih-i kitâb senesi şehr-i Receb’in on üçüncü günü müvekkil-i mezbûr Ca‘fer Bey mahrûse-i Galata’da kassâm-ı askerî olan Mevlana Abdülkerim Efendi huzûrunda vech-i muharrer üzere merkūm Süleyman Ağa’ya verdiğim meblağ-ı mezbûr beş bin akçeden zimmetini ibrâ eyledim eğer ba‘de’l-yevm husûs-ı mezbûra müte‘allika da‘vâ benden sudûr ederse mesmû‘a olmaya deyu ikrâr ve müvekkilim mezbûr dahi ba‘de’t-tasdîk mevlânâ-yı mezbûr mezbûr Ca‘fer Bey’in bu vech üzere ikrârını tahrîr edip müvekkilim mezbûr yedine işbu hücceti vermişdir deyu târih-i mezbûr ile müverraha ve mevlânâ-yı mezbûrun hat ve hatemini hâviye mazmûnu takrîr-i meşrûhunu nâtıka hüccet-i şer‘iyye ibrâz ve ziyâde üç bin akçe kabzını inkâr edicek gıbbe’l-istintâk ve’l-inkâr evvelâ vekîl-i mezbûr Mustafa Çelebi’den mazmûn-ı hücceti mübeyyine beyyine taleb olundukda udûl-i Müslimînden medîne-i mezbûrede Kiremidci mahallesinde sâkin Ahmed Beşe b. Mehmed ve yine medîne-i mezbûrede Evlice Baba mahallesi sükkânından Mehmed Çelebi b. Ahmed ve Mustafa Çelebi b. Rıdvan nâm kimesneler li-ecli’ş-şehâde meclis-i şer‘a hâzırûn olup gıbbe’l-istişhâd fi’l-hakīka müvekkil-i mezbûr Ca‘fer Bey târih-i mezbûrda kassâm-ı askerî olan mevlânâ-yı mezbûr huzûrunda merkūm Süleyman Ağa’ya verdiğim meblağ-ı mezbûr beş bin akçeden zimmetini ibrâ eyledim ikrâr ve mevlânâ-yı mezbûr dahi ba‘de’t-tahrîr merkūm Süleyman Ağa yedine işbu hücceti vermişdir biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle oldukdan sonra sâniyyen vekîl-i mezbûrdan ziyâdeyi mübeyyine beyyine taleb olundukda ityân-ı beyyine için istimhâl etmeğin mehl-i şer‘î ile imhâl olunup mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Mahmud Çelebi b. Abdi, Ali Çelebi, İbrahim b. Mehmed, Mahmud b. Hüseyin, Ali b. Rıdvan, Osman Beşe çukadâr ve gayruhüm.