Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 539 Hüküm no: 566 Orijinal metin no: [82b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Belkıs bt. Abdullah’ın Arabacı Bayezid mahallesindeki mülk menzil hissesini ortaklarının da izniyle Hamide bt. İbrahim Beşe’ye on iki bin akçeye sattığı Mahmiye-i İstanbul’da Arabacı Bayezid mahallesi sükkânından olup bundan akdem vefât eden Mehmed Usta b. ( ) verâseti zevce-i menkûhası Hâmide bt. İbrahim Beşe’ye ve sulbî sagīr oğlu [Ali]’ye ve sulbiye sagīre kızları Fâtıma ve Âişe’ye münhasıra olup kable’l-kısme mezbûr Ali dahi vefât edip verâseti cedde-i sahîhası Belkıs bt. Abdullah nâm hâtuna ve li-eb kız karındaşlar mezbûretân Fâtıma ve Âişe’ye ve li-ebeveyn ammi Muslı’ya münhasıra olduğu ve tereke-i müteveffâ-yı mezbûr bi-hükmi’l-münâsaha üç yüz seksen dört sehm i‘tibâr olunup sihâm-ı merkūmeden altmış dört sehmi zevcesi merkūme Hâmide’ye ve on altı sehmi müteveffâ-yı sânînin ceddesi merkūme Belkıs’a ve yüz kırk dört sehmi merkūme Fâtıma’ya ve yüz kırk dört sehmi merkūme Âişe’ye ve on altı sehmi müteveffâ-yı sânînin ammi merkūm Muslı’ya isâbet eylediği şer‘an mütehakkık oldukdan sonra husûs-ı âti’l-beyânın mahallinde tahrîri iltimâs olunmağın savb-ı şer‘-i hatîrden Mevlana Mehmed Efendi b. Veli Efendi irsâl olunup ol dahi mahmiye-i İstanbul’da Kızıltaş mahallesinde sâkin Mehmed Çelebi’nin menziline varıp zeyl-i kitâbda mastûru’l-esâmi olan udûl-i Müslimîn huzûrunda akd-i meclis-i şer‘-i hatîr etdikde müteveffâ-yı sânînin ceddesi olan merkūme Belkıs Hâtun meclis-i ma‘kūd-ı mezbûrda müteveffâ-yı evvelin zevcesi sâhibetü hâze’l-kitâb merkūme Hâmide mahzarında tav‘an ikrâr ve i‘tirâf edip müteveffâ-yı evvel-i mezkûrun [83a] terekesinden olup bi-hükmi’l-münâsahati’l-mezbûre zikri âtî akdin sudûruna değin silk-i mülk-i sahîhimizde ve taht-ı yed ve tasarrufumuzda münselik mülk ve hakkımız olup Arabacı Bayezid mahallesinde vâki‘ bir tarafdan Mehmed Çavuş mülküne ve bir tarafdan bazen Kürd Ahmed mülküne ve bazen mezkûr Arabacı Bayezid imâmına meşrût vakıf menzile ve bir tarafdan İdris Ağa mülküne ve bir tarafdan tarîk-ı âmma müntehî olup muhavvata-i dâhiliyyesi üç fevkānî ve bir sofayı ve bir kiler odasını ve abdesthâneyi ve kenîfi ve bir tahtânî odayı ve matbahı ve kurbünde bir odayı ve zât-ı eşcâr-ı müsmire ve gayr-ı müsmire hadîkayı ve bahçeyi ve iki su kuyusunu ve câmekânlı bir sagīr hamamı ve matbahı içinde bir fırını ve bir su kuyusunun ve muhavvata-i hâriciyyesi fevkānî iki bâb odayı ve sofayı ve tahtında iki bâb hizmetkâr odasını ve âharı ve samanlığı ve kenîfi ve bir su kuyusunu müştemil olan cemî‘ mülk menzilde olan altı sehm hisse-i şâyi‘amı kâffe-i hukūk ve merâfıkı ile sâir şürekâmın izniyle merkūme Hâmide Hâtun’a on iki bin râyic [fi’l]-vakt akçeye tarafeynden îcâb ve kabûlü hâvî bey-i sahîh ile bâtten bey‘ ve teslîm edip merkūme dahi nefsi’çün iştirâ ve kabûl ve tesellüm ettikden sonra semen-i merkūm olan [on] iki bin akçeyi tamâmen bana def‘ ve teslîm edip ben dahi ahz u kabz eyledim min ba‘d menzil-i mezbûrda olan on altı sehm hisse-i şâyi‘âm merkūme Hâmide’nin mülk-i müşterâsıdır keyfemâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ve ba‘dehû meclis-i şer‘a gelip vukū‘u üzere ihbâr ve takrîr edicek mâ-hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min-Zilka‘deti’ş-şerîfe li-sene seb‘a ve sittîn ve elf. Şühûdü’l-hâl: Nakşî İbrahim Ağa el-müteferrika, Halal Çavuş b. Osman, Solak İbrahim Çelebi b. Abdullah, Ahmed Beşe b. Halil zevc-i bâyi‘a-i mezbûre, el-Hâc Mehmed Çelebi b. İbrahim, el-Hâc Hasan b. İbrahim, Kahveci Abdullah Çelebi, Muslı Çelebi b. Abdullah.