Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 546 Hüküm no: 574 Orijinal metin no: [84a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Androni v. İzgormarina ve kız kardeşi Litorya ile Kasandra bt. Aleksandra’nın mülk menzillerini Yani v. Hıristo’ya sattıkları Mahmiye-i İstanbul’da Fenerkapısı dâhilinde Tahtaminare mahallesi sükkânından olup kendi kıbelinden asîl ve li-ebeveyn kız karındaşı Litorya bt. İzgormarina nâm Nasrâniye tarafından husûs-ı âti’l-beyânı ikrâra vekîl olup vekâleti mahalle-i mezbûreden Şeryano v. Papa Mihal ve Galata hâricinde Beyoğlu mahallesinde sâkin Yaraki v. İstefani nâm zimmîler şehâdetleriyle şer‘an sâbite olan Androni v. İzgormarina nâm zimmî ve kasaba-i Beşiktaş’da Sinan Paşa mahallesi sâkinelerinden Kasandra bt. Aleksandra nâm Nasrâniye tarafından husûs-ı âti’z-zikri ikrâra vekîl olup vekâleti mahalle-i mezbûreden Yorgi v. Duka ve Mihail v. Andreya nâm zimmîler şehâdetleri ile şer‘an sâbite olan zevci Mihalaki v. Yorgi nâm zimmî meclis-i şer‘-i hatîrde hâmilü hâze’l-kitâb Yani v. Hıristo nâm zimmî mahzarında herbiri bi’l-asâle ve bi’l-vekâle tav‘an ikrâr ve i‘tirâf edip zikri âti akdin sudûruna değin rub‘u müvekkilem Litorya’nın ve rub‘u benim ve nısfı müvekkile-i mezkûre Kasandra’nın silk-i mülk-i sahîhimizde ve taht-ı yed ve tasarrufumuzda münselik olup mahmiye-i Galata’da Kargözekapısı? demekle meşhur olan Kalavra mahallesinde vâki‘ iki tarafdan Bulak Mustafa Paşa Vakfı olup Panayot v. Yani nâm zimmî tasarrufunda olan menzile ve bir tarafdan Şahhuban Vakfı’na ve bir tarafdan tarîk-ı hâssa müntehî olup tabaka-i ulyâda köşkü ve tabaka-i vüstâda üç bâb odayı ve bir şehnişînli kebîr odayı ve matbahı ve dehlîzi ve kenîfi ve tabaka-i süflâda mahzeni ve bir su kuyusunu ve kenîfi ve havluyu müştemil olan ve cemî‘ mülk menzilimi kâffe-i hukūk ve merâfıkı ve âmme-i tevâbi‘ ve levâhıkı ile altmış üç bin râyic [fi’l]-vakt akçeye merkūm Yani’ye tarafeynden îcâb ve kabûlü hâvî bey‘-i bâtla bey‘ ve teslîm ve merkūm Yani dahi nefsi’çün iştirâ ve tesellüm ettikden sonra semen-i merkūm altmış üç bin akçeyi tamâmen bize def‘ ve teslîm edip biz dahi ahz u kabz eyledik min ba‘d cemî‘ menzil-i mezbûr merkūm Yani’nin mülk-i müşterâsıdır keyfe mâ yeşâ ve yahtâr mutasarrıf olsun dediklerinde mukırrân-ı mezbûrânı vech-i meşrûh üzere bi’l-asâle ve bi’l-vekâle cârî ve sâdır olan ikrârlarında el-mukarru lehü’l-mezbûr Yani dahi bi’l-müvâcehe tahkīk ve bi’l-müşâfehe tasdîk ettikden sonra kendi kıbelinden asîl ve kız karındaşı kıbelinden vekîl olan mezbûr Androni’nin sulbî kebîr oğlu İzgormarina nâm zimmî menzil-i mezbûrdan babası merkūm Androni’nin rub‘ hisse-i şâyi‘asının derkine ve babasının müvekkilesi merkūme Litorya’nın rub‘ hisse-i şâyi‘asının derkine tarafeynden îcâb ve kabûlü hâviye kefâlet-i sahîha-i şer‘iyye kefîl oldukdan sonra müvekkile-i mezkûrenin tevkîli şâhidi olup mezkûr Sinan Paşa mahallesi sükkânından olan Mihal v. Andreya menzil-i mezbûrdan müvekkile-i merkūme Kasandra’nın nısf hisse-i şâyi‘asının derkine tarafeynden îcâb ve kabûlü hâviye kefâlet-i sahîha-i şer‘iyye ile kefîl olmağın mâ-vaka‘a bi’t-taleb kayd şüd. Fi’l-yevmi’s-sâlis ve’l-ışrîn min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Hasan b. Abdullah, Mustafa b. Mehmed, Mustafa Beşe b. Süleyman, Ebûbekir b. Hasan, Salih b. Yusuf, Ramazan b. Abdullah ve gayruhüm.