Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 547 Hüküm no: 575 Orijinal metin no: [84a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kömürcü Asvador v. Erzişa’nın Eğin kazasındaki mülk bağını aldığı yüz guruş borç karşılığında Yosef v. Serkis’e üç yıllığına rehin verdiği Vilâyet-i Anadolu’da Eğin kazâsına tâbi‘ Şirzi nâm karye sükkânından olup kömürcü tâifesinden Asvador v. Erzişa nâm Ermeni meclis-i şer‘-i hatîr-i lâzimü’t-tevkīrde yine tâife-i mezbûreden işbu râfi‘ü’s-sifr Yosef v. Serkis nâm Ermeni muvâcehesinde bi-tav‘ihî ikrâr ve i‘tirâf edip silk-i mülkümde münselik olup karye-i mezbûrede vâki‘ bir tarafı Ramazan b. Hüseyin Bey bağına ve bir tarafı Babek v. Şehri bağına ve bir tarafı vadi ve bir tarafı tarîk-ı âmma müntehî mülk bağımı bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık târih-i kitâbdan üç sene tamâmına değin bey‘ bi’l-vefâ tarîkı ile mezbûr Yosef’e yüz riyâlî guruşa bey‘ ol dahi iştirâ ve kabûl eyledikden sonra semeni olan meblağ-ı mezbûr yüz riyâlî guruşu tamâmen mezbûr Yosef yedinden ahz u kabz edip zikrolunan bağı mahallinde kabz ve tasarrufa mezbûr Yosef’i taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb kayd şüd. Fi’l-yevmi’r-râbi‘ ve’l-ışrîn min-Zilhicceti’ş-şerîfe li-sene 1067. Şühûdü’l-hâl: İbrahim b. Abdullah, Mustafa Beşe b. Abdullah, Kasab Mehmed, Mehmed Çelebi, İsa Bey b. Ahmed, Osman Beşe çukadâr.