Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 547 Hüküm no: 576 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı Osman Efendi b. Davud’un Atik Ali Paşa mahallesindeki mülk menzilini aldığı borç karşılığında Ayşe bt. Sefer’e rehin verip iki yıllığına kiraladığı Mahmiye-i İstanbul’da Ali Paşa-yı atîk mahallesi sükkânından muvakkaten Öziçe kādısı fahrü’l-kuzât Osman Efendi b. Davud meclis-i şer‘-i hatîr-i lâzimü’t-tevkīrde bâ‘isetü hâze’l-kitâb Âişe bt. Sefer nâm hâtun mahzarında ikrâr ve takrîr-i kelâm edip işbu akdin sudûruna değin silk-i mülkümde münselik olup mahalle-i mezbûrede vâki‘ bir tarafdan bazen Muhib İskender Vakfı olan at değirmeni ve bazen Mehmed Çelebi değirmeni ve bir tarafdan Ahmed Çavuş Vakfı olan odalar ve bir tarafdan Ali Paşa Câmi‘-i şerîfi duvarı ile mahdûd dâhiliye ve hâriciyede fevkānî ve tahtânî büyût-ı adîdeyi ve bi’r-i mâ ve cüneyne ve kenîfi müştemil mülk menzilimi cemî‘ tevâbi‘ ve levâhıkıyla mezbûre Âişe Hâtun’a dört yüz seksen kıt‘a riyâlî guruşa bî-tarîkı’l-istiğlâl bey‘ ve teslîm edip ol dahi ba‘de’t-tahliyeti’ş-şer‘iyye kendi malıyla iştirâ ve tesellüm ve semeni olan meblağ-ı mezbûr dört yüz seksen kıt‘a riyâlî guruşu yedinden tamâmen ahz u kabz eylediğimden sonra menzil-i mahdûd-ı mezbûru bin altmış sekiz Muharremü’l-harâmı gurresinden iki sene tamâmına değin yüz seksen kıt‘a riyâlî guruşa istîcâr eylediğimde ol dahi îcâr ve teslîm eyledi dedikde gıbbe’t-tasdîkı’ş-şer‘î mukırr-ı mûmâ-ileyh Osman Efendi’nin zevce-i menkûhası Emine Hâtun bt. Hüseyin nâm hâtun meclis-i şer‘de mezbûre Âişe Hâtun mahzarında ikrâr edip derk-i menzil-i mahdûd-ı mezbûra ve ücret-i lâzımesine ben emr ve kabûlü hâviye kefâletle kefîl oldum dedikde mâ-hüve’l-vâki‘ bi’t-taleb ketb olundu Fi’l-yevmi’l-hâdî ve’l-ışrîn min-Zilhicceti’ş-şerîfe li-sene 1067. Şühûdü’l-hâl: El-hâc Hüseyin, Ahmed Çelebi, İsa Bey b. Ahmed, Osman Beşe çukadâr ve gayruhüm mine’l-[hâzırîn.]