Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 548 Hüküm no: 577 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia bt. Hacı Mustafa’nın Arnavutköy’deki menzilinin kiracısının kiracısı olan İstrona bt. İsak aleyhine açtığı alacak davasında zimmetini ibra ettiği Mahmiye-i İstanbul’da Âşık Paşa mahallesinde sâkine Râbia Hâtun bt. el-Hâc Mustafa tarafından âti’z-zikre vekîl olup vekâleti hüccet-i şer‘iyye ile sâbite olan Mustafa Beşe b. Abdullah meclis-i şer‘-i hatîrde Heradon cemâ‘atinden işbu râfi‘atü’s-sifr İstrona bt. İsak nâm Yahudiyye tarafından ikrâr-ı âti’z-zikri tasdîka vekîl olup nehc-i şer‘î ve tarîk-ı mu‘teber-i mer‘î üzere şer‘an vekâleti sâbite olan Sabetay v. Avraham nâm Yahudi muvâcehesinde bi’l-vekâle ikrâr ve i‘tirâf edip müvekkilem mezbûrenin silk-i mülkünde olup mahrûse-i Galata muzâfâtından Beşiktaş nâhiyesine tâbi‘ Arnavudköyü nâm karyede vâki‘ ma‘lûmü’l-hudûd büyût-ı adîdeyi müştemil menzilini bundan akdem senede onar bin akçe ücretle işbu hâzır bil-meclis Baryam v. Yaşova nâm Yahudiye îcâr ve teslîm ol dahi ba‘de’l-istîcâr ve’t-tesellüm menzil-i mezbûrun nısf-ı şâyi‘inde senede beşer bin akçe ücretle müvekkile-i mezbûre İstrone’yi iskân etmekle hâlâ müvekkilem mezbûre Râbia merkūme İstrona’dan sen menzil-i mezbûrun nısfını senede beşer bin akçeye istîcâr ve kabz eylemekle altı senede târih-i kitâba gelince ücret-i merkūmeden zimmetinde otuz bin akçe müctemi‘ oldu deyu meblağ-ı mezbûru vekâleten da‘vâ ve taleb etmişidim hâlâ da‘vâ-yı mezbûreden gerek müvekkile-i mezbûre İstrona’yı ve gerek mezbûrenin kızı oğlu olup menzil-i mezbûrda ma‘an sâkin olan Salamon v. Semovil nâm Yahudi’nin zimmetlerini menzil-i mezbûra ve gerek ücretine müte‘allika cemî‘ de‘âvî ve mutâlebât ve eymân ve muhâsamâtdan vekâletim hasebiyle ibrâ-i âm ile ibrâ ve ıskāt eyledim min ba‘d müvekkile-i mezbûrenin menzil-i mezbûra ve gerek ücretine müte‘allika müvekkile-i merkūme İstrona ve Salamon ile bi-vechin mine’l-vücûh da‘vâ ve alâkası kalmadı dedikde gıbbe’t-tasdîkı’l-mu‘teber mâ-vaka‘a kayd şüd. Fi’l-yevmi’r-râbi‘ ve’l-ışrîn min-Zilhicceti’ş-şerîfe li-sene 1067. Şühûdü’l-hâl: Ahmed b. Hamza, Mehmed Çelebi b. İbrahim, Ahmed b. Abdullah, Osman Beşe çukadâr.