Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 549 Hüküm no: 578 Orijinal metin no: [84b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Ebubekir’in Mustafa Ağa b. Osman’dan iki yüz kırk bin akçe alacağı olduğu ve alacağını tahsil etmek üzere Mustafa Bey b. Hasan’ı vekil tayin ettiği Mahmiye-i İstanbul’da Horhorçeşme kurbünde sâkin iken maktûlen vefât eden Mahmud Ağa b. Mehmed’in vâlidesi olup hâlâ Bosna Eyaleti’nde vâki‘ Payiçe Kal‘ası’nda sâkine olan Âişe Hâtun bt. Ebîbekir tarafından meblağ-ı âtî[yi] kabza vekâlet iddia eden Mustafa Bey b. Hasan meclis-i şer‘-i hatîrde Bosna serhaddi kılâ‘ından Banaluka kazâsına tâbi‘ Gravişka nâm kal‘a ağalarından Mustafa Ağa b. Osman mahzarında üzerine takrîr-i da‘vâ edip merkūm Mustafa Ağa târih-i kitâb senesi Saferi evâhirinde müvekkilem merkūme Âişe Hâtun yedinden ve malından her kîsesi kırkar bin akçe olmak üzere altı kîsede cem‘an iki yük kırk bin râyic [fi’l]-vakt akçeyi ikrâz ve kabz ve masârıfına sarf [ve] istihlâk edip zimmetinde deyn olmakla meblağ-ı mezbûru mezbûr Mustafa Ağa’dan taleb ve ahza ve kendüye îsâle ve husûmet ve redd-i cevâba tarafından beni vekîl ve menâbına nâib nasb ü tâyin eyledikde ben dahi vekâlet-i mezbûreyi kabûl ve hizmet-i lâzımesin edâya müte‘ahhid olduğum ecilden meblağ-ı merkūm iki yük kırk bin akçeyi merkūm Mustafa Ağa ta‘annüd edip meblağ-ı mezbûru bana teslîmden imtinâ‘ eder suâl olunup alıverilmesini taleb ederim dedikde gıbbe’s-suâl merkūm Mustafa Ağa cevâbında fi’l-hakīka müvekkile-i mezbûre Âişe Hâtun’un zimmetimde vech-i meşrûh üzere ehet-i karz-ı şer‘îden iki yük kırk bin râyic [fi’l]-vakt akçe hakkı vardır deyu merkūme Âişe Hâtun’dan meblağ-ı mezbûru iktirâz ve kabz ve istihlâkle zimmetinde deyn olduğuna tav‘an i‘tirâf edip lâkin merkūm Mustafa Bey’in vekâleti inkârından mâ‘adâ meblağ-ı mezbûru merkūme Âişe Hâtun bana târih-i mezkûrdan bir sene tamâmına değin te’cîl eylemişdir hâlâ ecel-i mezkûrun hulûlüne altmış gün dahi kalmışdır deyu da‘vâ-yı def‘ eyledikde karzda ecel sahîh olmamağla merkūm Mustafa Ağa[’nın] def‘i sahîh olmadığı ecilden mezkûr Mustafa Bey’den vekâlet-i meşrûhasını mübeyyine beyyine [taleb] olundukda Ayasofya şeyhi olan eş-Şeyh Osman Efendi etbâ‘ından Mustafa Çelebi b. Ali ve Murad Çelebi b. Osman Çavuş ve muvakkatan Mostar kādısı olup Payiçe Kal‘ası sükkânından olan Fazlullah Efendi b. Mustafa ve mahmiye-i mezbûrede el-Hâc Bayram mahallesinde sâkin el-Hâc İsmail b. Ali nâm kimesneler li-ecli’ş-şehâde meclis-i şer‘a hâzırûn olup gıbbe’l-istişhâd herbiri münkir-i merkūm Mustafa Ağa mahzarında şehâdet edip fi’l-hakīka müteveffâ-yı mezbûr Mahmud Ağa’nın vâlidesi olup hâlâ kal‘a-i mezbûrede sâkine olan mezkûre Âişe Hâtun bt. Ebîbekir bizim huzûrumuzda merkūm Mustafa Bey’i zimmetinde olan cihet-i karz-ı şer‘îden mezkûr Mustafa Ağa zimmetinde olan meblağ-ı mezbûr iki yük kırk bin akçe hakkını taleb ve ahza ve kendüye îsâle ve cem‘iyetde vukū‘ bulan husûmet ve redd-i cevâba vekîl ve menâbına nâib nasb ve ta‘yîn eyledikde merkūm Mustafa Ağa dahi vekâlet-i mezbûreyi kabûl ve hizmet-i lâzımesini edâya müte‘ahhid olmakla hâlâ merkūm Mustafa Ağa’nın teslîmi vâcibdir biz bu husûsa şâhidleriz şehâdet dahi ederiz deyu edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle oldukdan sonra şehâdet-i mezkûre mûcebince merkūm Mustafa Bey’in vekâletine ba‘de’l-hükm meblağ-ı mezbûr vekîl-i merkūm Mustafa Bey’e edâ ile merkūm Mustafa Ağa üzerine lâzım olunup mâ-hüve’l-vâki‘ bi’t-taleb ketb olundu. Fî 15 Zilhicce li-sene 1067. Şühûdü’l-hâl: Osman Beşe b. Sevindik, Süleyman Bey b. Hasan, Ali Beşe er-râcil, İbrahim b. Ömer, Mehmed Efendi b. Veli, İsmail Çelebi b. ( ), Mehmed b. Ahmed.