Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 550 Hüküm no: 579 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Ali’nin Kulaksız mahallesindeki mülk ev hissesini kardeşi Mehmed’e yedi bin akçeye sattığı Mahmiye-i Galata hâricinde kasaba-i Kasımpaşa’da Kulaksız mahallesi sükkânından Ahmed b. Ali nâm kimesne meclis-i şer‘-i hatîrde li-ebeveyn karındaşı olup zikri âtî mülk menzilin nısf-ı şâyi‘ine mülkiyet üzere vâzı‘u’l-yed olduğu şer‘an sâbit olan sâhibü hâze’l-kitâb Mehmed b. Ali mahzarında üzerine da‘vâ ve takrîr-i kelâm edip mahalle-i mezbûrede vâki‘ olup bir tarafdan Mehmed Çelebi b. Hâmid mülküne ve bir tarafdan Ca‘fer b. Abdullah mülküne ve bir tarafdan Hüseyin Çelebi b. Memi mülküne ve bir tarafdan tarîk-ı âmma müntehî olup tahtânî ve fevkānî büyût-ı adîdeyi müştemil olan cemî‘ mülk menzili ile’l-vefât babamız merkūm Ali’nin mülk ve hakkı olmakla ba‘de vefâtihî nısf-ı şâyi‘i bana ve nısf-ı şâyi‘-i âharı karındaşım mezbûra irs-i şer‘î ile intikāl etmekle târih-i kitâbdan yirmi sene mukaddem menzil-i merkūmdan nısf-ı şâyi‘ hissemi her ne vakitde edâ edersem yine menzil-i merkūm benim mülküm olup bana reddolunmak üzere karındaşım mezbûrun hâl-i sıgārında vasiyy-i mansûbesi ve vâlidemiz işbu hâzıratü bi’l-meclis Salih bt. Sefer’e yedi bin akçeye bey‘ ve teslîm ol dahi vesâyeten iştirâ ve kabûl ve tesellüm edip semen-i merkūm yedi bin akçeyi karındaşım mezbûr malından bana def‘ ve teslîm ben dahi ahz u kabz etmişidim hâlâ kavl-i mezkûra binâen meblağ-ı mezbûr yedi bin akçesini karındaşım mezbûra def‘ ve menzil-i mezbûrdan nısf-ı şâyi‘ hissemi zabt murâd eylediğimde karındaşım mezbûr ta‘annüt eder suâl olunsun dedikde gıbbe’s-suâl mezbûr Mehmed cevâbında fi’l-hakīka mahalle-i mezbûrede vâki‘ olup hudûd-ı mezkûre ile mahdûd olan cemî‘ menzil ile’l-vefât babamız ve mûrisimiz merkūm Ali’nin mülkü olup ba‘de vefâtihî irs-i şer‘î ile nısf-ı şâyi‘i bana ve nısf-ı şâyi‘-i âharı karındaşım müdde‘î-i mezbûra intikāl etdikde karındaşım merkūm Ahmed menzil-i mezbûrdan nısf-ı şâyi‘ hissesini târih-i mezbûreden bey‘ murâd edip tâlibîne arz etmekle ben sagīr olduğum ecilden vâlidem ve savb-ı şer‘den vasiyy-i mansûbem işbu Sâliha benim için vesâyeten şirâya talibe oldukda karındaşım mezbûr Ahmed menzil-i mezbûrdan nısf hisse-i şâyi‘asını kâffe-i hukūkuyla tarafeynden îcâb ve kabûlü hâvî bey‘-i bât ile yedi bin râyic [fi’l]-vakt akçeye bey‘ ve teslîm edip mezbûre dahi bi’l-vesâye iştirâ ve kabûl ve semen-i merkūmu benim malımdan tamâmen mezbûra def‘ ve teslîm edip hatta mezbûr Ahmed menzil-i mezbûrdan nısf-ı şâyi‘ hissesini vech-i meşrûh üzere benim için vâlidem ve vasiyy-i mansûbem işbu Sâliha’ya bey‘ ve teslîm ve malımdan semen-i merkūmu merkūme Sâliha yedinden tamâmen ahz u kabzını bin kırk yedi senesi Şevvâlü’l-mükerremi’nin yirminci gününde mahmiye-i İstanbul’da Mahmudpaşa Mahkemesi’nde hilâfeten müvellâ olan Mevlânâ Yahya Efendi b. Ali huzûrunda tav‘an i‘tirâf ve vâlidem merkūme yedine hüccet-i mübâya‘a dahi vermişdir deyu def‘le mukābile ve mazmûnu min külli’l-vücûh takrîrin nâtık ve mevlânâ-yı mezbûrun imzâ ve hatemini hâviye hüccet-i şer‘iyye ibrâz edip müdde‘î-i mezbûr muvâcehesinde feth u kırâat ve istintâk olundukda müdde‘î-i mezbûr Ahmed mazmûn-ı hüccet-i merkūmeyi tav‘an ikrâr ve i‘tirâf edicek i‘tirâfı üzere da‘vâ-yı meşrûhasından men‘ olunup mâ-hüve’l-vâki‘ kayd şüd. Fi’l-yevmi’r-râbi‘ ve’l-ışrîn min Zilhiceti’ş-şerîfe li-sene seb‘a ve sittîn ve elf. Şühûdü’l-hâl: Es-seyyid Mehmed Çelebi, el-Hâc Hüsnü b. Mustafa, el-Hâc Receb b. Abdullah, İsa Bey b. Ahmed, Osman Beşe çukadâr.