Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 551 Hüküm no: 580 Orijinal metin no: [85a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meleknazire bt. Bali’nin Şeyh Ferhad mahallesindeki arsasını haksız yere zaptettiği iddiasıyla İsayi v. Marat aleyhine açtığı davada haksız olduğu Mahmiye-i İstanbul’da Şeyh Ferhad mahallesinden olup bundan akdem Acem diyârında ticaret üzere iken hâlik olan Bâli v. Koca Baron nâm Ermeni’nin verâseti zevce-i metrûkesi Meryem ile sulbiye kebîre kızı Meleknazire nâm Ermeniyelere münhasıra olduğu şer‘an mütehakkık oldukdan sonra mezbûre Meleknazire mahfil-i kazâda mahalle-i mezbûrede sâkine iken bundan akdem hâlik olan Meleki bt. Şehri nâm Ermeniyenin sadrî kebîr oğlu ve bi’l-inhisâr verâseti olup zikri âtî arsaya mülk-i mevrûsu olmak üzere vâzı‘u’l-yed olan işbu hâmilü’s-sifr İsayi v. Marat nâm Ermeni muvâcehesinde üzerine takrîr-i da‘vâ edip mahalle-i mezbûrede vâki‘ üç tarafı mezbûr İsayi mülküne ve bir tarafdan mülk-i mevrûsum olup bundan akdem Şehamye nâm Ermeniye bey‘ eylediğim menzile müntehî tûlen altı zirâ‘ ve arzan bir başı üç zirâ‘ ve bir başı on sekiz parmak arsa mûrisim hâlik-i mezbûr Bâli’nin ile’l-helâk mülkü olup ba‘de helâkihî bi-hasebi’l-irsi’ş-şer‘î sekiz sehm i‘tibâr olunmağla bir sehmi mezbûre Meryem’e ve yedi sehmi bana isâbet ve intikāl etmişiken mezbûr İsayi arsa-i mezbûreyi bi-gayrı hakkın zabt edip vaz‘-ı yed eder suâl olunup hisse-i meşrûham olan yedi sehimden kasr edip bana teslîme tenbîh olunmak matlûbumdur dedikde gıbbe’s-suâl mezbûr İsayi cevâbında fi’l-vâki‘ arsa-i mezbûre hâlik-i mezbûrun mülkü olup lâkin kırk iki senesi evâhirinde arsa-i mezbûreyi on kıt‘a riyâlî guruşa semen-i makbûza vâlidem hâlike-i mezbûre Meleki’ye hayatında bâtten bey‘ ve teslîm edip mezbûre Meleki dahi iştirâ ve tesellüm ve mürd oldukda irsen bana intikāl eylemişdir hatta hâlik-i mezbûr Bâli hâl-i hayatında ve kemâl-i akl [ve] sıhhatinde arsa-i mezbûreye muttasıl olan menzilinin duvarını müceddeden binâ ederken arsa-i mezbûreyi vech-i muharrer üzere vâlideme on riyâlî guruş semen-i makbûza bâtten bey‘ ve teslîm eylediğini alâ re’si’l-işhâd ikrâr edip vâlidem mezbûre dahi hayatda olmakla tasdîk eylemişdir ol vechile arsa-i mezbûreye mülk-i mevrûsum olmak üzere vaz‘-ı yed ederin deyu def‘le mukābile edicek gıbbe’l-istintâk ve’l-inkâr mezbûr İsayi’den def‘-i mezbûrunu mübeyyine beyyine taleb olundukda kıbel-i şerî‘at-i mergūbeden üzerine varılıp şühûddan istimâ‘ olunmağı iltimâs ettiklerinde şühûdu mahallinde istimâ‘a me’zûnen irsâl olunan Mevlânâ Şeyhzâde Mustafa Efendi b. Şeyh Mehmed arsa-i mezbûre üzerine varıp zeyl-i sahîfede isimleri mastûr olan Müslimîn huzûrunda akd-i meclis-i şer‘-i şerîf eyledikde mahalle-i mezbûre sükkânından Kuyumcu Bahtiyar v. Dolot ve Nacar v. David nâm Ermeniler li-ecli’ş-şehâde meclis-i ma‘kūd-ı mezbûra hâzırân olup herbiri münkire-i mezbûre Meleknazire muvâcehesinde şehâdet edip fi’l-vâki‘ işbu müdde‘iye-i mezbûre Meleknazire’nin babası hâlik-i mezbûr kemâl-i akl [ve] sıhhatinde işbu duvarı müceddeden binâ ederken işbu arsa on guruş semen-i makbûza mezbûr İsayi’nin vâlidesi olan Melek[i] bt. Şehri’ye bey‘ ve teslîm edip ol dahi iştirâ ve tesellüm eyledi deyu huzûrumuzda ikrâr ve bizi işhâd edip mezbûre Meleki dahi hayatda olmakla ikrâr-ı mezbûru tasdîk eyledi ol vechile arsa-i mezbûre işbu İsayi’nin mülk-i mevrûsu olduğuna şâhidleriz şehâdet dahi ederiz dediklerinde vâki‘ hâli mevlânâ-yı mezbûr şâhidân-ı mezbûrân [ile] zeyl-i sahîfede isimleri muharrer olan Müslimîn ile tezkiye eyledikden sonra ba‘de’t-tahrîr ma‘an ba‘s olan Ahmed Çelebi ile meclis-i şer‘a gelip haber verdiklerinde şâhidân-ı mezbûrânın şehâdetleri makbûle olmağın mûcebince ba‘de’l-hükm mâ-vaka‘a. Fî 23 min-Zilhicce sene [10]67. Şühûdü’l-hâl: Durmuş Halîfe el-müezzin, Abdülkadir attâr, Siyami b. Mehmed, Sefer Bey attâr, Mustafa Beşe b. ( ).