Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 553 Hüküm no: 582 Orijinal metin no: [85b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Halîfe b. Halil’in Koruk Mahmud mahallesindeki mülk evini Hasan Bey’in kızları Ümmühani ve Neslihan’a sattığı Medine-i Ebî Eyyûb-i Ensârî mahallâtından Takyecibaşı mahallesi sükkânından olup Başmuhâsebe’de ikinci halîfe olan umdetü erbâbi’t-tahrîr ve’l-kalem İbrahim Halîfe b. Halil meclis-i şer‘de mahmiye-i İstanbul’da Koruk Mahmud mahallesi sükkânından Ümmühani ve Neslihan bintey Hasan Bey nâm hâtunlar taraflarından ikrâr-ı âtîyi tasdîka vekîl olup vekâleti bi-mâ-hüve nehcü’s-sübût şer‘an sâbite olan fahrü’l-cüyûş Ramazan Çavuş b. Abdullah mahzarında ikrâr edip silk-i mülkümüzde münselik olup zikr olan Koruk Mahmud mahallesinde vâki‘ iki tarafı müvekkiletân-ı mezbûretân mülklerine ve bir tarafı Hüseyin Çelebi mülküne ve bir tarafı tarîk-ı âmma müttehî hâriciyesi fevkānî üç oda ve müşterek su kuyusu ve dâhiliyesi fevkānî iki oda ve bir kenîf ve tahta-pûş ve tahtânî bir oda ve bir kiler ve bir ahır ve müşterek su kuyusu ve cüneyneyi hâvî mülk menzilim cemî‘ hudûd ve hukūk ve müştemilâtı ile müvekkiletân-ı mezbûretân Ümmühani ve Neslihan’a tarafeynden îcâb ve kabûlü hâvî bey‘-i bâtt-ı sahîh-i şer‘î ile yirmi iki bin ceyyid ve cedîd akçeye bey‘ ve teslîm onlar dahi ale’l-iştirâk iştirâ ve tesellüm ve kabûl ve kabz eylediklerinden sonra semeni olan meblağ-ı mezbûr yirmi iki bin akçeyi mezbûretân yedlerinden tamâmen ahz u kabz edip ba‘de’l-yevm menzil-i mezkûrda ve semeninde hak ve alâka ve medhalim kalmadı keyfe mâ yeşâ mutasarrıf olsun[lar] dedikde gıbbe’t-tasdîk mâ-vaka‘a bi’t-taleb ketb olundu. Fî evâhiri Zilhicce sene 1067. Şühûdü’l-hâl: Ya‘kub Efendi b. Şa‘ban el-imâm, Mehmed Çelebi b. Süleyman el-müezzin, Mustafa b. Muharrem el-kayyûm, İbrahim b. Mehmed, İdris Ağa b. ( ), Mehmed Bey b. ( ) el-cündi, Mehmed Bey b. ( ), Abdullah Efendi b. Mehmed el-câbî, Ömer Ağa b. Ali mütevellî-i Fâtıma Sultan, Hüseyin Çelebi el-kâtib.