Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 554 Hüküm no: 583 Orijinal metin no: [85b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem bt. Devlet üzerine Kazar v. Yagob’un vasi ve Meryem’in annesi ve dedesinin de vasi üzerine nazır tayin olundukları Mahmiye-i İstanbul’da Şeyh Ferhad mahallesi sükkânından iken bundan akdem hâlik olan Devlet v. Avraham’ın sulbiye sagīre kızı Meryem’in tesviye-i umûruna savb-ı şer‘-i hatîrden mansûb vasîsi olup yine mahalle-i mezbûrede sâkin olan Avraham v. Lazari nâm Ermeni hâlik olmakla sagīre-i mezbûrenin tesviye-i umûruna vasî nasb olunması lâzım ve mühim olduğu ecilden hâkim-i muvakkı‘-ı sadr-ı kitâb tûbâ lehü ve hüsnü-meâb hazretleri yine mahalle-i mezbûreden olup emânet ile mevsûfe olduğu müte‘ayyin olan hâmilü hâze’l-kitâb Kazar v. Yagob nâm Ermeni’yi tesviye-i umûr-ı sagīre-i mezbûreye vasî nasb ü ta‘yîn edip sagīre-i mezbûreye lâzimü’l-iştirâ olanı şirâya ve mâl-ı mevrûsundan bey‘i lâzım olanı bey‘a ve cemî‘ umûrunu edâya rüşd ü sedâdına değin tesviyeye merkūm Kazar’a izin verdikde ol dahi vesâyet-i mezbûreyi kabûl ve hizmet-i lâzımesin edâya müte‘ahhid oldukdan sonra sagīre-i mezbûrenin anası ( ) bt. Papa Avraham ile ceddi mezkûr Papa Avraham’ı vasiyy-i merkūm Kazar üzerine hasbî nâzır nasb ü ta‘yîn edip mezbûrân dahi nezâret-i merkūmeyi kabûl ve hizmet-i lâzımesin edâya müte‘ahhid olduklarından sonra hâkim-i mûmâ-ileyh esbağallâhü ni‘amehû aleyh hazretleri vasiyy-i merkūm Kazar’a umûr-ı vesâyet-i mezkûreyi nâzırân-ı merkūmân re’yleri üzere edâ ve itmâma tenbîh buyurup mâ-hüve’l-vâki‘ bi’t-taleb ketb olundu. Fi’l-yevmi’l-ışrîn min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Abdurrahman Çelebi b. Mehmed, Hüseyin Bey b. Abdullah, Durmuş Halîfe b. Satılmış, Berber Üstâd Mahmud b. Bayezid, Müezzin Mehmed Çelebi ve gayruhüm.