Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 579 Hüküm no: 605 Orijinal metin no: [91a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanımşah bt. Dede Bali’nin tasarrufunda bulunan vakıf menzili Canfeda Hanım’ın kocası Oruç Beşe b. Abdullah’a ücreti karşılığında devrettiği Mahmiye-i Edirne’de Hâcegi mahallesi sâkinelerinden Hânımşâh bt. Dede Bâli nâm hâtun mahmiye-i mezbûrede meclis-i şer‘de zikri âtî vakıf menzile vâzı‘atü’l-yed olan Canfeda bt. Abdullah mahzarında mahmiye-i mezbûrede Müslime Hâtun Vakfı’na berât-ı âlî ile mütevellî olan Mehmed Dede b. Seydi Ali huzûrunda merkūmân Canfeda ve Mehmed Dede üzerlerine takrîr-i da‘vâ edip merhûme-i merkūme evkāfından olup mahalle-i mezbûrede vâki‘ bir tarafdan merhûm Mustafa Paşa sarayına ve bir tarafda Kâtib Mehmed Çelebi menziline ve bir tarafdan Üveys Bey nâm cündi mülküne ve bir tarafdan tarîk-ı âmma müntehî olup iki bâb tahtânî odayı ve bir kileri ve bir su kuyusunu müştemil olan cemî‘ vakıf menzil bundan akdem icâre-i mu‘accele ve beher mâh on beş akçe icâre-i müeccele ile ma‘rifet-i mütevellî ile babam mezbûr Dede Bâli b. Ali’nin taht-ı yedinde ve tasarrufunda olup ba‘de vefâtihî intikāl-i âdî ile bana intikāl etdikde cemî‘ menzil-i mezbûru merkūme Canfeda Hâtun’un zevci Oruc Beşe b. Abdullah’a mezbûr Mehmed Dede’nin ma‘rifeti ve vekâleti ile beş bin altı yüz akçeye ferâğ ve tefvîz ve teslîm edip ol dahi tefevvüz ve kabûl ve tesellüm ettikden sonra bedel-i mezbûrdan bin dokuz yüz akçesini vekîlim mezbûr Mehmed Dede yedinden ahz u kabz edip meblağ-ı bâkī üç bin altı yüz akçeyi kable’l-ahz mezbûr Oruc vefât edip verâseti zevce-i merkūme Canfeda ile sulbiye sagīre kızları Fâtıma ve Hadice’ye münhasıra olup ba‘dehû merkūmetân Fâtıma ve Hadice dahi müte‘âkiben fevt olup verâsetleri ancak vâlideleri mezbûre Canfeda’ya münhasıra olup tereke-i müteveffâ-yı merkūmeye mezbûre Canfeda vaz‘-ı yed etmekle meblağ-ı bâkī-i mezbûr müteveffâ-yı mezbûr Oruc üzerinde kaldı ise terekesinden taleb ederin ve illâ hâl-i hayâtında vekîlim mütevellî-i mezbûr Mehmed Dede’ye teslîm etdi ise mezbûr Mehmed Dede’den taleb ederin suâl olunsun dedikde gıbbe’s-suâl merkūme Canfeda Hâtun cevâbında zevci müteveffâ-yı mezbûr Oruc Beşe menzil-i mezbûru müdde‘iye-i merkūmeden meblağ-ı mezbûr beş bin altı yüz akçeye ma‘rifet-i mütevellî-i merkūm ile ba‘de’l-kabz cemî‘ meblağ-ı merkūmu mezbûr Hânımşâh Hâtun’a tamâmen def‘ ve teslîm edip ol dahi ahz u kabz eyledi deyu da‘vâ-yı def‘ edicek gıbbe’l-istintâk merkūme Hânımşâh Hâtun mezbûru [91b] def‘-i mezkûru bi’l-külliye inkâr edicek mezbûr Canfeda Hâtun’dan def‘-i meşrûhunu mübeyyine beyyine taleb olundukda mahmiye-i mezbûrede Taşlık mahallesinde sâkin olup merkūme Hânımşâh Hâtun’un babası müteveffâ-yı mezbûrun li-ebeveyn kız karındaşı oğlu olan Hasan b. İbrahim ve Hâcegi mahallesi sükkânından Mehmed b. Abdullah nâm kimesneler meclis-i şer‘a li-ecli’ş-şehâde hâzırân olup gıbbe’l-istişhâd herbiri münkire-i merkūme muvâcehesinde şehâdet edip fi’l-hakīkat hudûd-ı mezkûre ile mahdûde olup mahalle-i mezbûrede vâki‘ merhûme Müslime Hâtun Vakfı olan cemî‘ menzil icâre-i mu‘accele ve beher mâh on beş akçe icâre-i müeccele ile merkūme Hânımşâh’ın babası mezbûr Dede Bâli b. Ali’nin taht-ı yedinde ve tasarrufunda olup ba‘de vefâtihî intikāl-i âdî ile kızı merkūmeye intikāl ettikden sonra merkūme Hânımşâh cemî‘ menzil-i mezbûru bi-nefsihâ meblağ-ı mezbûr beş bin altı yüz akçe bedel mukābilesinde mütevellî-i merkūm Mehmed Dede’nin ma‘rifeti ile müteveffâ-yı mezbûr Oruc Beşe’ye ferâğ ve tefvîz ve teslîm edip ol dahi tefevvüz ve kabûl ve tesellüm ettikden sonra bedel-i merkūm beş bin altı yüz akçeyi bizim huzûrumuzda tamâmen müdde‘iye-i merkūme Hânımşâh Hâtun’a def‘ ü teslîm edip ol dahi ahz u kabz eyledi biz bu husûsa şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde ba‘de ri‘ayeti şerâiti’l-kabûl şehâdetleri makbûle oldukdan sonra şehâdet-i mezkûre mûcebince müdde‘iye-i merkūme Hânımşâh Hâtun da‘vâ-yı meşrûhasından men‘ olunup mâ-vaka‘a bi’t-taleb ketb olundu. Fi’l-yevmi’r-râbi‘ aşer min şehri Rebî‘i’l-evvel li-sene semân ve sittîn ve elf. Şühûdü’l-hâl: Üveys Bey b. Mustafa, İsa Bey b. Ahmed el-muhzır, Musa Çelebi b. Memi Bey, Kâtib Mehmed Çelebi b. Memi Bey, İbrahim Bey b. Ömer.