Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 581 Hüküm no: 607 Orijinal metin no: [91b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Sefer’in cariye olarak satın aldıktan sonra hür olduğu anlaşılan Gevher bt. Veli Bey ile on dört bin akçe üzerine sulh olduğu Vilâyet-i Rumeli’nde medîne-i Ruscuk sâkinelerinden Âişe bt. Sefer nâm hâtun mahmiye-i Edirne’de meclis-i şer‘de açık kaşlı orta boylu elâ gözlü sol elinde ur ta‘bîr olunur alâmeti olan Gevher bt. Veli Bey nâm hâtun mahzarında tav‘an ikrâr ve i‘tirâf edip merkūme Gevher’i bundan akdem câriye-i memlûkesi olmak üzere vilâyet-i mezbûrede Leş nâm kasabada sâkin Topal Mehmed Bey mahmiye-i Edirne’de sâkine Hamamcı Sâliha nâm hâtuna beynlerinde ma‘lûm semene bâtten bey‘ ve teslîm edip kabz-ı semen ettikden sonra merkūme Hamamcı Sâliha Hâtun dahi ba‘de’l-iştirâ ve’t-tesellüm câriye-i memlûkesi olmak üzere semen-i ma‘lûme Seyyid İbrahim nâm kimesneye bâtten bey‘ ve teslîm ve kabz-ı semen ettikden sonra merkūm Seyyid İbrahim dahi ba‘de’l-iştirâ ve’t-tesellüm câriye-i memlûkesi olmak üzere silk-i mülkümde münselik olup vasıf ve cinsleri beynimizde ma‘lûm iki re’s câriye ile bir riyâlî guruşa bî-tarîkı’l-mukābeze bana bey‘ ve teslîm edip mezbûre Gevher dahi adım Firuz’dur deyu rıkka inkıyâd ve beni iştirâ eyle demesiyle ben dahi iştirâ ve tesellüm eyleyip mülk-i müşterâm olmak üzere vaz‘-ı yed edip taht-ı yedimde iken merkūme Gevher’in Arnavud cinsinden olup Arnavudluk’da Leş nâm kasaba sükkânından Veli Bey nâm bevvâb-ı sultanînin firâşından hâsıl ve Fâtıma nâm hürretü’l-asıldan mütevellîde olup bir vechile bana ve ebeveynime asla rık târî olmamışdır deyu üzerime da‘vâ-yı hürriyet edip ba‘de’l-inkâr medîne-i Ruscuk’da bin altmış beş senesi Cumâdelâhıresinin yedinci gününde hilâfeten müvellâ olan Mevlânâ Sun‘ullâh Efendi b. eş-Şeyh İsmail Efendi huzûrunda şuhûd-ı udûl ile hürretü’l-asl olduğunu muvâcehemde isbât ve hürriyetine hükmolundu lâkin bâyi‘-i mezbûr Seyyid İbrahim’in mekânı ma‘lûm olmayıp ve merkūme Gevher’i merkūm Seyyid İbrahim vech-i muharrer üzere bana bey‘ ve teslîm etdikde merkūme Gevher bey‘a inkıyâd ve ismim Firuz’dur beni iştirâ eyle demesiyle beni tağrîr ve ona binâen iştirâ eylediğim ecilden merkūme Gevher’in bâyi‘i merkūm Seyyid İbrahim’e verdiğim câriyetân-ı mezbûretânın hîn-i teslîminde olan kıymetleri ve bir riyâlî guruş ile merkūme Gevher’e mürâca‘at ve taleb eylediğimde merkūme Gevher vech-i meşrûh üzere merkūm Seyyid İbrahim kendüyi bana bey‘ ve teslîm murâd etdikde beni iştirâ eyle benim ismim Firuz’dur deyu rıkka inkıyâd ve ikrârın tav‘an i‘tirâf edip lâkin câriyetân-ı mezbûretânın hîn-i teslîmde olan kıymetlerini tamâmen edâya adem-i kudretinden te‘allül ve nizâ‘ üzere idi el-hâletü hâzihî [92a] beynimize muslihûn tavassut edip merkūme Gevher ile beni da‘vâ-yı mezkûremden on dört bin râyic [fi’l]-vakt akçe üzerine sulh eylediklerinde ben dahi sulh-ı mezbûru kabûl ve mâ‘adâ da‘vâsından merkūme Gevher’in zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d merkūme Gevher üzerinde meblağ-ı mezbûrdan mâ‘adâ alâka ve hakkım kalmayıp ve lâkin mezbûre Gevher’in dahi bedel-i mezkûru def‘aten bana edâya iktidârı olmayıp taksîte tâlibe olmasıyla ben dahi meblağ-ı mezbûrdan üç bin beş yüz akçesini târih-i kitâbdan otuz gün tamâmına değin ve üç bin beş yüz akçesini dahi târih-i kitâbdan üç yüz altmış gün tamâmına değin ve meblağ-ı bâkī yedi bin akçenin her üç bin beş yüz akçesini dahi her üç yüz altmış gün tamâmına değin mecmû‘-ı meblağ-ı mezbûru bin seksen gün tamâmında edâ ve teslîm etmek üzere taksît eyledim dedikde merkūme Gevher dahi mukırre-i mezbûre Âişe’yi minvâl-i meşrûh üzere cârî ve sâdır olan ikrârında bi’l-müvâcehe ve bi’l-müşâfehe tahkīk ve tasdîk edip ve taksît-i mezbûru kabûlüne tav‘an ikrâr ve i‘tirâf edicek mâ-hüve’l-vâki‘ bi’t-taleb ketb olundu Fi’l-yevmi’l-ışrîn min şehri Rebî‘i’l-evvel li-sene semân ve sittîn ve elf. Şühûdü’l-hâl: Boyacı İbrahim Çavuş el-mübâşir, el-Hâc Osman Çavuş b. Mahmud bölük çavuşu, Berber Mustafa Beşe b. el-Hâc Mehmed, Hüseyin Beşe b. Abdülkadir, Arslan Bey b. ( ) sâkin-i Ruscuk, es-Seyyid Mehmed Çelebi kâtib-i ahkâm, Ebûbekir b. İsmail Beşe, el-Hâc Ca‘fer b. Abdullah el-muhzır, İbrahim Bey b. Ömer.