Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 583 Hüküm no: 608 Orijinal metin no: [92a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimetoka kazasına bağlı Pokrayan köyü ahalisinin haksız yere paralarını aldığı iddiasıyla Seyyid Mehmed Ağa b. Hasan aleyhine açtıkları davada dört bin akçeye sulh oldukları Vilâyet-i Rum[eli’nde] Dimetoka kazâsına tâbi‘ Pokuryan nâm karye sükkânından Dimitri v. Lamro ve Marko v. Todori ve Elho v. Kosta ve Todo v. Niko ve Angeli v. Kiro nâm zimmîler kendi taraflarından asâleten ve karye-i mezbûre sükkânından olup ma‘lûmü’l-esâmi ve’l-eşhâs olan sâir zimmîler taraflarından husûs-ı âti’z-zikr sulh ve ibrâya vekîl olup hasm-ı şer‘î-i câhid mahzarında bi-mâ-hüve nehcü’s-sübût şer‘an vekâleti sâbite olan mezkûr Dimitri vekâleten mahmiye-i Edirne’de meclis-i şer‘de mahmiye-i mezbûrede Zehrimar mahallesi sükkânından sâhibü hâze’l-kitâb mefharü’s-sâdâti’l-kirâm es-Seyyid Mehmed Ağa b. Hasan mahzarında herbiri tav‘an ikrâr ve i‘tirâf edip mûmâ-ileyh Seyyid Mehmed Ağa’dan yedinden ve malından bin altmış beş senesinde otuz bir bin akçe iktirâz ve kabz ve masârıfımıza sarf ve istihlâk ile deynimiz oldukdan sonra meblağ-ı mezbûru tamâmen def‘ ve teslîm etmişiken meblağ-ı mezbûr iki sene üzerimizde durmağla devr-i şer‘î ile üzerimize ilzâm-ı ribh etmedin bir sene için yedi bin iki yüz akçemiz ve ikinci sene için üç bin akçemiz cem‘an on bin iki yüz akçemizi bi-gayrı hakkın ahz u kabz etmişidi hâlâ zafer bulup meblağ-ı mezbûru mûmâ-ileyh Seyyid Mehmed Ağa’dan taleb ve da‘vâ ettiğimizde ol dahi cevâbında üzerinize devr-i şer‘î ile ilzâm-ı ribh edip ahz eyledim deyu def‘le mukābile edicek beynimizde münâza‘ât-ı kesîre vâkı‘a olmuşidi el-hâletü hâzihî beynimize muslihûn tavassut edip mezbûr Seyyid Mehmed Ağa ile bizi bilâ-ilzâm-ı şer‘î ahz eyledi deyu da‘vâ ettiğimiz on bin iki yüz akçe da‘vâsında dört bin akçe üzerine sulh eylediklerinde biz dahi bi’l-asâle ve’l-vekâle sulh-ı mezbûru kabûl ve bedel-i sulh olan meblağ-ı mezbûr dört bin akçeyi mûmâ-ileyh Seyyid Mehmed Ağa yedinden meclis-i sulhda tamâmen ahz u kabz edip husûs-ı mezbûra müte‘allik âmme-i de‘âvâdan ve târih-i kitâbe gelince beynimizde vâki‘ olan ahz u i‘tâya müte‘allik âmme-i hukūk da‘vâsından mezbûr Seyyid Mehmed Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik min ba‘d mezbûr Seyyid Mehmed Ağa üzerine husûs-ı mezbûra ve sâir hukūk-ı ma‘lûmeye müte‘allik bi-vechin mine’l-vücûh ve sebebin mine’l-esbâb da‘vâ ve hakkımız yokdur dediklerinde mukırrûn-ı mezbûrûnu vech-i meşrûh üzere cârî olan ikrârlarında mezbûr Seyyid Mehmed Ağa bi’l-müvâcehe tasdîk etmeğin mâ-vaka‘a bi’t-taleb ketb olundu. Fi’l-yevmi’r-râbi‘ min Rebî‘i’l-evvel li-sene semân ve sittîn ve elf. Şühûdü’l-hâl: Abaza Mehmed Ağa b. Abdullah, Kabil Ağa b. Abdullah, Mehmed Ağa b. Abdullah, Ali Çelebi b. Mehmed, İbrahim Bey b. Ömer ve Hâcı Ca‘fer el-muhzır.