Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 584 Hüküm no: 609 Orijinal metin no: [92a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varislerinden Bayram Bey’in Ömer Ağa’nın katili olduğu iddiasıyla hakkında dava açılan Kethüdayeri Hasan Ağa’nın suçsuz olduğunu beyanı Fi’l-asl Vilâyet-i Anadolu’da Karahisâr-ı sâhib kazâsına tâbi‘ Tekeli nâm karyeden olup mahmiye-i İstanbul’da Hobyar mahallesinde sâkin iken bundan akdem vilâyet-i mezbûrede Eskişehir sancağında Bozöyük kasabasında vâki‘ kendi mülk menzilinde maktûl bulunan Ömer Ağa b. Mehmed b. Yusuf nâm müteveffânın verâseti zevcesi Vâhide bt. Ali ile müteveffâ-yı mezbûrun babası mezbûr Mehmed’in li-eb karındaşı İlyas’ın oğlu Bayram Bey’e münhasıra olduğu bi’l-fi‘il Karahisâr-ı sâhib’de hilâfeten müvellâ olan Kasım Efendi b. İbrahim tarafından vârid olan nakl-i şer‘î ile sâbit oldukdan sonra mezbûr Bayram Bey mahmiye-i Edirne’de meclis-i şer‘-i şerîfde Bozöyük kasabası sükkânından olup Bozöyük kasaba sipâhîlerine kethüdâyeri olan sâhibü hâze’l-kitâb Hasan Ağa b. Mehmed nâm cündi mahzarında tav‘an ikrâr ve i‘tirâf edip ammim müteveffâ-yı mezbûru eşkıyâ tâifesi kendi menzilinde gece ile basıp katl etmişler iken ben hâzır değil iken zevce-i metrûkesi mezbûre Vâhide merkūm Hasan Ağa üzerine zevcim mezbûr Ömer Ağa’yı sen katl eyledin deyu da‘vâ ve mezbûr Hasan Ağa inkâr edicek mezbûre Vâhide ityân-ı beyyineye kādire olmamağla da‘vâ-yı mezkûreden fâriğa olmuşidi [92b] fi’l-hakīka ammim mezbûrun kātili merkūm Hasan Ağa olmayıp menzilinde eşkıyâ tâifesi gece ile basıp katl etdiklerine bana ilim hâsıl olmağın müteveffâ-yı mezbûrun dem ve diyeti da‘vâsında merkūm Hasan Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d ammim mezbûr Hasan Ağa üzerine ammim müteveffâ-yı mezbûrun dem ve diyetine müte‘allik bi-vechin mine’l-vücûh ve sebebin mine’l-esbâb da‘vâ ve hakkım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ aşer min şehri Rebî‘i’l-evvel li-seneti’l-mezbûre. Şühûdü’l-hâl: Mefharü’l-a‘yân Mustafa ağa-i mehterân hâlâ, Mustafa Çavuş b. Süleyman Ağa, Mehmed Çavuş b. Derviş Ağa, Mehmed Bey b. Hızır, Mehmed Başe el-cündi, Yeğen Hüseyin Ağa el-cündi, Aydın b. Receb, el-Hâc Hüseyin b. ( ), Mehmed Ağa b. Sefer Kütahya kethüdayeri.