Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 399 Hüküm no: 381 Orijinal metin no: [83b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in vakıf olduğunu ve kendisine intikal ettiğini iddia ettiği evle ilgili Ebulmevahib Efendi’ye açtığı dava [Eksik Kayıt] Dârü’l-hilâfeti’l-aliyye Kostantıniyye el-mahmiye’de el-Hâc Hasan Mahallesi’nde sâkine Âişe bt. Mehmed nâm hatun zâtını ma‘rifet-i şer‘iye ile ârifân olan sadrî oğlu Mehmed Nev‘î b. Şeyh Mustafa es-Sanablı ve Vücûdîzâde Mustafa ta‘rîfleriyle mu‘arrefe oldukdan sonra saray-ı Hazret-i Sadr-ı a‘zamî’de ma‘kūd meclis-i şer‘-i şerîfde sâbıkā Kuds-i Şerîf kādısı olup vefât eden Figānîzâde merhûm Mehmed Efendi b. Sâlim’in kebîr oğlu ve zikri âtî menzile vâzı‘u’l-yed olduğu sâbit ve mukarrer olan hâmilü hâze’l-kitâb Ebû’l-mevâhib Efendi mahzarında üzerine da‘vâ ve takrîr-i kelâm edip mahalle-i mezbûrede vâki‘ bir tarafı ba‘zan Emine Hatun menzili ve ba‘zan Abdi Efendi menzili ve bir tarafı Safiye Hatun menzili ve tarafeyni tarîk-ı âm ile mahdûd dâhiliye ve hâriciyesi büyût-ı adîdeyi müştemil menzil mahalle-i mezbûre sükkânından Mehmed Ağa b. Murad ile zevcesi [Sâliha] bt. el-Hâc Himmet’in ale’l-iştirâki’s-seviy mülkleri olmağla mezbûr Mehmed Ağa hayatında kendi tarafından asâleten ve zevcesi merkūme Sâliha Hatun tarafından sâbitü’l-vekâle vekîli olmağla vekâleten erba‘ ve selâsîn ve elf senesi Rebî‘ülâhiri gurresinde müfettiş-i evkāf Ahmed Efendi b. Rasûl huzûrunda tebdîl ve tağyîr ve ihrâc ve idhâl yedlerinde olmak üzre vakf ve habs edip süknâsını hayatda olduklarınca kendi taraflarına ba‘dehû mukaddem vefât edenin hissesine hayatda olan tasarruf ede ve ba‘de-vefâtihimâ evlâdları ve evlâd-ı evlâdları batnen ba‘de-batnin mutasarrıf olalar ba‘de’l-inkırâz mezbûr Mehmed Ağa’nın hissesine atîkası ve evlâd-ı atîkası mutasarrıf olup ba‘de’l-inkırâz îcâr ve hâsıl olan icâresi Medîne-i Münevvere fukarâsına irsâl oluna ve mezbûre Sâliha’nın hissesine li-ebeveyn karındaşı Osman b. el-Hâc Himmet mutasarrıf ola ba‘dehû evlâdı ve evlâd-ı evlâdı karnen ba‘de-karnin tasarruf edip ba‘dehûm mezbûrenin atîkası ve evlâd-ı atîkası ve evlâd-ı evlâd-ı atîkası mutasarrıf olalar ve ba‘dehûm kezâlik îcâr olunup hâsıl olan nemâsı fukarâ-i mersûmeye irsâl oluna ve tevliyet-i hasbiyesi cümle-i meşrûtun-lehümden aslahına ola ve ahâlî-i mahalle-i mezbûre hasbî nâzır olalar ve lâzım gelen imâret ve meremmetini bu beytde sâkin olanlar edeler deyü şart ve ta‘yîn ve menzil-i mezbûru li-ecli’t-tescîl mütevellî nasb ve ta‘yîn olunan Muzaffer Bey b. Abdülmüteâl’e teslîm ol dahi tesellüm ve kabz eyledikden sonra ba‘de’l-mürâfa‘ati’l-ma‘hûde hâkim-i mezbûr Ahmed Efendi dahi vakf-ı mezbûrun sıhhat ve lüzûmuna hükmedip vakfiye tahrîr ve menzil-i mezbûr vakf-ı sahîh ve lâzım ile vakf olup mezbûrân vefât eylediklerinde hasren vâriseleri olan kızları Hadîce nâm hatun ber-mûceb-i şart-ı vâkıfân menzil-i mezbûra mutasarrıfa olup fevt oldukda kendiden sonra fevt olan Süleyman ile ben sadrî evlâdı ve hâlâ şartları üzre menzil-i mezbûrun tasarruf ve tevliyetine ben müstahıkka iken 1077 senesi Zilhiccesinden beri menzil-i mezbûra evvelâ merkūm Mehmed Efendi ve ba‘de-vefâtihî oğlu mezkûr Ebû’l-mevâhib Efendi mâlikâne zabt ve tasarruf ederler suâl olunup kasr-ı yed ve bana teslîm olunmak matlûbumdur dedikde gıbbe’s-suâl mezbûr Ebû’l-mevâhib Efendi cevâbında menzil-i mahdûd-ı mezkûr mahalle-i mezbûrede sâkine merkūme Hadîce Hatun’a vâlideyni mezbûrân Mehmed Ağa ve Sâliha’dan bi’l-irsi’ş-şer‘î müntakil mülkü olmağla menzil-i mezbûru 1077 senesi Zilhiccesinin beşinci günü sadrî oğlu Süleyman’a semen-i ma‘lûma bey‘ ve teslîm ol dahi iştirâ ve def‘-i semen edip menzil-i mezkûr mülk-i müşterâsı oldukdan sonra mezbûr Süleyman dahi kezâlik mâh-ı mezbûrun on birinci günü babam mezbûr Mehmed Efendi’ye 1000 esedî guruşa bey‘-ı kat‘î ile bey‘ ve temlîk ve kabz-ı semen ve teslîm-i mebî‘ edip babam mezbûrun mülk-i müşterâsı oldukdan sonra menzil-i mezkûr harâba müşrif olup kābil-i süknâ olmamağla kendi mâlıyla müceddeden binâ ve ta‘mîr edip mâlikâne ile’l-vefât mutasarrıf ve ba‘de-vefâtihî bi’l-irsi’ş-şer‘î bana isâbet etmekle ilâ-yevminâ hâzâ ben mutasarrıfım deyü ber-vech-i meşrûh tasarrufunu ikrâr lâkin merkūm Mehmed Ağa’nın târih-i mezkûrda zevcesi mezkûre tarafından vekâleten müfettiş-i merkūm Ahmed Efendi’nin vakfı tescîl ve hükme me’zûn olup ber-vech-i muharrer. [Bu hükmün devamı defterde bulunmamaktadır.]