Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 398 Hüküm no: 380 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen efendisinin karısı tarafından satılmak istenen müdebber köle Ali b. Abdullah’ın hür olduğunun ispatlandığı El-emru kemâ zükira fîh harrerehü’l-fakīr ila’llâhi te‘âlâ Mustafa el-kādî bi-medîneti Kastamonu afiye anhü. Hakemtü bi-teneffüzin ba‘de’l-mürâfa‘a ve ene’l-abdü’l-fakīr ileyhi Sübhânehû Hâmid el-kādî bi-askeri Rumeli -ufiye anhü-. İşbu orta boylu açık kaşlı koyun elâ gözlü sarışın Rusiyyü’l-asl sahibü hâze’l-kitâb Ali b. Abdullah nâm gulâm-ı emred meclis-i şer‘-i hatîr-i lâzımü’t-tevkīrde medîne-i Kastamonu’da Kebkebirler Mahallesi’nde sâkin iken bundan akdem müteveffâ olan Sofuzâde demekle ma‘rûf Mehmed Efendi b. İbrahim Dede’nin terekesine vâzı‘u’l-yed olan zevce-i metrûkesi Fâtıma bt. el-Hâc Ali nâm hatun mahzarında üzerine da‘vâ ve takrîr-i kelâm edip müteveffâ-yı mezbûr Mehmed Efendi’nin ben abd-i memlûkü olup hâl-i hayatında ve kemâl-i akl [ve] sıhhatinde tedbîr-i mutlak ile beni müdebber edip ba‘de-vefâtihî sülüs mâlı kıymetime vâfî olup hâlâ ben hür olmuş-iken mezbûr Fâtıma beni rıkk olmak üzre bey‘ murâd eder suâl olunup ıtkıma hükm ve sebîlim tahliye [olunmak] matlûbumdur dedikde gıbbe’s-suâl mezbûr Fâtıma cevâbında fi’l-vâki‘ merkūm minvâl-i muharrer üzre müteveffâ-yı mezbûr Mehmed Efendi’nin abd-i memlûkü olduğunu ikrâr ve müdebber eylediğini inkâr etmeğin mezbûr Ali’den müdde‘âsını mübeyyine beyyine taleb olundukda ahrâr-ı ricâlden medîne-i mezbûrede Cebrail Mahallesi’nde sâkin Boyacı el-Hâc Himmet b. İbrahim ve mahalle-i mezbûre sükkânından Osman Efendi b. el-Hâc Ahmed ve Mustafa b. Murad nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-hakīka müteveffâ-yı mezbûr Mehmed Efendi mevsûf-ı mezbûr Ali’yi hâl-i hayatında ve kemâl-i akl [ve] sıhhatinde bizim huzûrumuzda tedbîr-i mutlak ile müdebber eyledi ve ba‘de-vefâtihî sülüs mâlı dahi mevsûf-ı mezbûr Ali’nin kıymetine vâfî olmağla hâlâ mevsûf-ı mezbûr Ali sâir ahrâr-ı Müslimîn gibi hür olmuşdur biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a olmağın mûcebiyle mevsûf-ı mezbûr Ali’nin ıtkına ba‘de’l-hükm mâ-vaka‘a bi’t-taleb ketb olundu. Fi’l-yevmi’l-âşir min-şehri Zilka‘deti’ş-şerîfe li-sene tis‘ ve semânîn ve elf. Şuhûdü’l-hâl: Fahrü’l-akrân Çer Hasanzâde Mustafa Ağa, Çolakoğlu Mustafa Halîfe, Dellâl Topal Mehmed, Hasan b. Ahmed Beşe, Receb b. el-Hâc Hüseyin, Dilaver b. Abdullah.