Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 398 Hüküm no: 379 Orijinal metin no: [83a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Resko v. Petko’nun yanan evinin arsasını Kasandra bt. Yorgi’ye sattığı Mahmiye-i İstanbul’da Ali Paşa-yı Atîk Mahallesi’nde sâkin Resko v. Petko nâm zimmî meclis-i şer‘de bâ‘isetü hâzihi’l-vesîka Kasandra bt. Yorgi nâm Nasrâniye tarafından husûs-ı âti’z-zikre vekîl olup bimâ-hüve nehcü’s-sübût şer‘an vekâleti sâbite olan zevci Dimitraki v. Anaştaş nâm zimmî muvâcehesinde bi’t-tav‘i’s-sâf ikrâr-ı tâm ve takrîr-i kelâm edip akd-i âtî sudûruna değin silk-i mülkümde münselik olup mahalle-i mezbûrede vâki‘ bir tarafı Meydâncı Dimitraki v. Can mülkü ve iki tarafı yine mezbûre Kasandra mülkü ve bir tarafı tarîk-ı âm ile mahdûd muhterik menzilim arsasını enkāz ve bi’r-i mâ’ ve sâir cemî‘ tevâbi‘ ve levâhıkı ve kâffe-i hukūk ve merâfıkı ile mezbûre Kasandra’ya yüz altmış beş esedî guruşa tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve temlîk ve teslîm ol dahi iştirâ ve kabûl ve temellük ve tesellüm eylediğinden sonra semeni olan meblağ-ı mezbûr yüz altmış beş esedî guruşu yedinden bi’t-tamam ve’l-kemâl ahz ü kabz ve tesellüm eyledim ba‘de’l-yevm arsa-i mezbûre merkūme Kasandra’nın mülk-i müşterâsıdır keyfe mâ teşâ’ ve tahtâr mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşer min-Rebî‘i’l-âhir li-sene ihdâ ve tis‘în ve elf. Şuhûdü’l-hâl: Mustafa Efendi b. Durak el-imâm, İsmail Efendi b. Süleyman el-müezzin, Ahmed Halîfe b. Derviş, Abdülkerim b. Mustafa el-kayyûm, Hasan Halîfe b. ( ), İbrahim Halîfe b. ( ), Mehmed Çelebi b. Haydar.