Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 397 Hüküm no: 378 Orijinal metin no: [83a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Murad’ın eski Ankara kadısı Hasan Efendi’ye açtığı alacak davasının reddedildiği Vilâyet-i Anadolu’da medîne-i Ankara mahallâtından Öksüzce Mahallesi’nde sâkin el-Hâc Yusuf b. Mirza nâm kimesne meclis-i şer‘-i şerîf-i enverde sâbıkā medîne-i mezkûre kādısı olan bâ‘isü hâze’l-kitâb umdetü’l-mevâli’l-kirâm zübdetü’l-ulemâi’l-fihâm Hasan Efendi tarafından husûs-ı âti’z-zikre vekîl olup es-Seyyid Hüseyin Efendi b. es-Seyyid Abdülbaki ve Mehmed Efendi b. Sunullah şehâdetleriyle şer‘an vekâleti sâbite olan es-Seyyid Ahmed Efendi b. es-Seyyid Mustafa mahzarında üzerine da‘vâ ve takrîr-i kelâm edip müvekkil-i mûmâ-ileyh Hasan Efendi mukaddemâ medîne-i mezkûre kādısı iken mahalle-i mezkûre ahâlîsinden gāibûn ani’l-meclis el-Hâc Osman ve el-Hâc Ebûbekir nâm kimesneler senin kulun? mahalle-i mezbûre ahâlîsinden es-Seyyid Ahmed’in sagīr oğlu es-Seyyid Osman’ı urup katletmişdir deyü müvekkil-i mezbûrun emriyle bi-gayr-ı vechin şer‘î bir def‘a elli beş esedî guruş ve yine bir def‘a mûmâ-ileyhin etbâ‘ından Ko[ca] Çavuş Zülfikar b. Ahmed yediyle yirmi yedi buçuk guruş ki cem‘an seksen iki buçuk guruşumu ahz ü kabz etmişler idi hâlâ vekîl-i mezbûrdan suâl olunup meblağ-ı mezbûr müvekkil-i mûmâ-ileyhden alıverilmek matlûbumdur dedikde müdde‘î-i mezbûr meblağ-ı mezkûru mezkûrûn el-Hâc Osman ve el-Hâc Hasan ve el-Hâc Ebûbekir’in bâlâda tafsîl olunan minvâl üzre ahz ü kabz ve kabzlarını mu‘terif iken müvekkil-i müşârün-ileyhden talebi nâ-meşrû‘ olmağın müdde‘î-i mezbûr bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’l-hâmis aşer min- Rebî‘i’l-âhir li-sene ihdâ ve tis‘în ve elf. Şuhûdü’l-hâl: es-Seyyid Hüseyin Efendi b. es-Seyyid Abdülbaki, Mehmed Efendi b. Sunullah, el-Hâc Kemâleddin Ağa b. Müyesser, Ahmed Çelebi b. Abdurrahman, Mehmed Çelebi b. Haydar, Ahmed Çelebi b. Piyale.