Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 396 Hüküm no: 377 Orijinal metin no: [83a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe b. Şa‘ban’ın iptal edilen ev satışından üzerinde kalan meblağı Receb Beşe b. Mahmud’a teslim etmesi Havâss-ı Refî‘a kazâsına tâbi‘ Silivri kasabasında Ali Bey Mahallesi sükkânından işbu bâ‘isü’l-kitâb Receb Beşe b. Mahmud nâm kimesne meclis-i şer‘-i hatîr-i lâzımü’t-tevkīrde Hüseyin Beşe b. Şa‘ban nâm kimesne mahzarında üzerine da‘vâ ve takrîr-i kelâm edip mezbûr Hüseyin Beşe işbu hâzıra bi’l-meclis Solak Mehmed Çelebi kızı Fâtıma nâm hatunun mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd menzilini bey‘e ve kabz-ı semene vekîl olmak üzre menzil-i mezbûru bundan akdem bana on bin akçeye bey‘ ve teslîm ben-dahi iştirâ ve tesellüm edip semeni olan meblağ-ı mezbûr on bin akçenin dört bin sekiz yüz akçe olmak üzre kırk esedî guruşunu mezbûr Hüseyin Beşe’ye def‘ ve teslîm ol dahi ahz ü kabz etmekle hâlâ mezbûre Fâtıma Hatun menzil-i mezbûru bey‘e ve kabz-ı semene mezbûr Hüseyin Beşe’yi vekîl etdiğini inkâr edip mezbûr Hüseyin Beşe dahi ber-vech-i muharrer vekâletini isbât edemeyip mezbûre Fâtıma Hatun’a yemîn verdiğinden sonra merkūme Fâtıma Hatun menzil-i mezbûru benden kabz ve tesellüm etmekle mezbûr Hüseyin Beşe’ye medfû‘um olan meblağ-ı mezbûr kırk esedî guruş merkūm Hüseyin Beşe’nin yedinde kalmağın suâl olunup meblağ-ı mezbûru bana red ve teslîme mezbûr Hüseyin Beşe’ye tenbîh olunmak matlûbumdur dedikde gıbbe’s-suâl mezbûr Hüseyin Beşe cevâbında kazıyye müdde‘î-i mezbûrun tafsîl etdiği vech üzre olup menzil-i mezbûr için müdde‘î-i mezbûrdan ber-vech-i muharrer kırk esedî guruş ahz ü kabz ve hâlâ yedinde olduğunu bi’t-tav‘i’s-sâf ikrâr ve i‘tirâf etmeğin mûcebince meblağ-ı mezbûr kırk guruşu müdde‘î-i mezbûra edâ ve teslîme merkūm Hüseyin Beşe’ye tenbîh birle mâ-vaka‘a bi’t-taleb ketb olundu. Fi’l-yevmi’l-hâmis aşer min-Rebî‘i’l-âhir li-sene ihdâ ve tis‘în ve elf. Şuhûdü’l-hâl: Attar Durmuş Beşe b. ( ), Attar Hasan Beşe b. Abdullah, Ahmed Efendi el-kayyûm, Musa Beşe b. ( ), Kara Mehmed Pazarcı b. ( ).