Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 104 Hüküm no: 67 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anoroçko ve eşi Zali’nin ev hisselerini Estamo v. Harsolomo’ya satmaları Mahmiye-i İstanbul’da Nişâncı Cafer mahâllesinde sâkin Anoroçko v. Panayot nâm zimmî ile zevcesi Zoli bt. Sarrâc Yamandi nâm Nasrâniye mahmiye-i mezbûrede meclis-i şer‘-i hatîrde işbu bâ‘isü’s-sifr Estamo v. Harsolomo nâm zimmî muvâcehesinde her biri ikrâr-ı tam ve takrîr-i kelâm edip akd-i âti’z-zikrin sudûruna değin müşâ‘ ve müşterek yedimizde mülk ve hakkımız olup mahâlle-i mezbûrede vâki‘ bir tarafdan Kiro nâm zimmî tasarrufunda olan vakıf menzil ve bir tarafdan Yani nâm zimmî mülkü ve bir tarafdan Camcı Solak mülkü ve bir tarafdan tarîk-i âm ile fevkānî üç bâb oda ve bir dehliz ve havlu ve bir mikdâr arsayı müştemil mülk menzilimizin üç sehim i‘tibârıyla iki sehim-i şâyi‘ini cümle tevâbi‘i ile mezbûr Estamo’ya yedinde olan hüccet-i şer‘iyye nâtık olduğu üzere bundan akdem yüz kırk guruş ile bir kara kılıç mukābelesinde bey‘ ü teslîm ve kabz-ı semen-i mezbûr eylediğimizden sonra sülüs hissemiz kalmış idi, hâlâ menzil-i mahdûd-ı mezkûrda bâkī kalan bir sehm-i şâyi‘i dahi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile yine mezbûr Estamo’ya yüz seksen guruşa bey‘ ü teslîm ve temlîk ol dahi ber-vech-i muharrer iştirâ ve tesellüm ve temellük ve kabz ve kabûl edip semeni olan meblağ-ı mezbûr yüz seksen guruşu mezbûr Estamo bize meclis-i şer‘de def‘ ü teslîm biz dahi yedinden ahz u kabz eyleyip ba‘de’l-yevm menzil-i mahdûd-ı mezkûrun mecbû‘u [15a] mezbûr Estamo’nun mülk-i müşterâsı ve hakk-ı sırfı olup bizim kat‘â alâka ve medhalimiz kalmadı. Keyfemâ yeşâ ve yahtâr mutasarrıf olsun dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Muharremü’l-haram li-sene sitte aşere ve mi’e ve elf. Şuhûdü’l-hâl: Osman Efendi b. Mehmed el-imâm, Molla Süleyman b. İbrahim, Molla İbrahim b. Rasul, Hacı Abdullah odabaşı, el-Hâc Yusuf b. Osman. Papa Yorgi ve Yamandi, İvaz v. Hıristo, Atanaş v. Ayvaz, Panayot v. Nikola, Dimitri v. Petro, Hıristo v. Dimitri, Yanaki v. Marko