Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 120 Hüküm no: 90 Orijinal metin no: [19a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi’nin Ahmed Beşe’de olan alacağının tahsili Vilâyet-i Anadolu’da medîne-i Konya ahâlîsinden olup mahmiye-i İstanbul’da Halıcılarda müsâfiren sâkin işbu bâ‘isü’l-vesîka Ahmed Çelebi b. el-Hâc Abdullah nâm kimesne mahmiye-i mezbûrede meclis-i şer‘-i hatîrde Ahmed Beşe b. Abdullah nâm kimesne mahzarında üzerine da‘vâ ve takrîr-i kelâm edip mezbûr Ahmed Beşe zimmetinde bundan akdem iştirâ ve kabz eylediği üç yüz kırk iki aded sarı sahtiyan bahasından bâkī yüz beş guruş dört para hakkım olmağla hâlâ meblağ-ı mezbûru merkūm Ahmed Beşe’den taleb eylediğimde bana edâdan imtinâ‘ eder. Suâl olunup alıverilmesi matlûbumdur dedikde, gıbbe’s-suâl mezbûr Ahmed Beşe cevâbında fi’l-hakīka müdde‘î-i mezbûr Ahmed Çelebi’ye ber-vech-i muharrer yedinden iştirâ ve kabz eylediği sahtiyan bahasından zimmetinde yüz beş [guruş] dört para bâkī deyni olduğunu tâyi‘an ikrâr u i‘tirâf etmeğin alâ-mûceb-i i‘tirâfihî meblağ-ı bâkī-i mezbûr yüz beş guruş dört parayı müdde‘î-i mezbûra edâ ve teslîme mezbûr Ahmed Beşe’ye tenbîh olunup mâ-hüve’l-vâki‘ bi’t-taleb ketb ü imlâ ve yed-i men-lehü’t-talebe vaz‘ u i‘tâ olundu. Hurrire fi’l-yevmi’s-sâdis min-Saferi’l-hayr li-sene sitte aşere ve mi’e ve elf. Şuhûdü’l-hâl: Hüseyin Efendi b. Himmet, İsmail Efendi el-kâtib, Mehmed Emin Efendi el-kādî, Veliyüddin Efendi el-kādı, Ömer Efendi el-kâtib, Mustafa Efendi el-kādı, Mehmed Efendi b. Hüseyin el-kâtib, el-Hâc Mehmed Efendi el-kādı, el-Hâc Yusuf b. Osman.