Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 119 Hüküm no: 89 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avram v. Avanik’in, Ömer b. Mustafa aleyhindeki alacak davasının reddedilmesi Mahmiye-i İstanbul’da Vâlide Hanı’nda sâkin sarrâf Avraham v. Avanik nâm zimmî mahmiye-i mezbûrede meclis-i şer‘de vilâyet-i Anadolu’da Lârende ahâlîsinden olup mahrûse-i Edirne’de Yusuf Efendi Hanı’nda sâkin iken bundan akdem fevt olan es-Seyyid el-Hâc Mehmed b. el-Hâc Mustafa’nın sulbiye sagīre kızı Şerîfe Havva’nın kıbel-i şer‘den mansûb vasîsi olan işbu râfi‘ü’l-vesîka el-Hâc Ömer b. el-Hâc Mustafa mahzarında üzerine da‘vâ ve takrîr-i kelâm edip merkūm el-Hâc Ömer bundan akdem oğlum gāib ani’l-meclis Mircan’a sagīre-i mezbûre malından üç bin yüz yetmiş beş guruş idâne ve teslîm ol dahi yedinden tamâmen ahz u kabz edip ben meblağ-ı mezbûra emr u kabûlü hâviye kefâlet-i sahîha-i şer‘iyye ile kefil olduğumdan sonra meblağ-ı mezbûrdan iki yüz otuz dokuz guruşunu oğlum gāib-i mezbûr Mircan merkūm el-Hâc Ömer’e edâ ve teslîm edip mâ‘adâsı olan iki bin sekiz yüz otuz altı guruşunu dahi ben kefâletime binâen tamâmen edâ ve teslîm ol dahi ahz u kabz ve birbirimizi ibrâ eylediğimizden sonra mezbûr el-Hâc Ömer benden beynimizde olan hesâbdan hâriç ziyâde kırk sekiz guruş kıymetli bir Mardin peşkiri ve altmış dirhem şerîfî altın ve nakid seksen iki buçuk guruşumu dahi bi-gayrı hakkın ahz u kabz etmişdir. Suâl olunup icrâ-yı hak olunmak matlûbumdur dedikde gıbbe’s-suâl mezbûr el-Hâc Ömer cevâbında zikr olunan kırk sekiz guruş kıymetli peşkiri ve altmış dirhem şerîfî altını ve nakid seksen iki buçuk guruşun kabzını ve ber-vech-i muharrer ibrâ-i ikrâr lâkin mârrü’z-zikr peşkir ve altın ve meblağ-ı mezbûr seksen iki buçuk guruş dahi sâlifü’z-zikr üç bin yüz yetmiş beş guruşda dâhildir deyü def‘le mukābele edicek gıbbe’l-istintâk ve’l-inkâr mezbûr el-Hâc Ömer’den def‘-i mezkûrunu mübeyyine beyyine taleb olundukda udûl-i Müslimînden olup mahmiye-i mezbûrede Gedikpaşa mahâllesi sâkinlerinden Osman Çelebi b. Ahmed ve Şehzâde Câmi‘-i şerîfi kurbünde sâkin es-Seyyid el-Hâc Ahmed b. Ebubekir nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka müdde‘î-i mezbûrun iddi‘â eylediği kırk sekiz guruş kıymetli Mardin peşkiri ve altmış dirhem şerîfî altın ve seksen iki buçuk guruşu mezbûr el-Hâc Ömer’in asil-i merkūm Mircan ile babası kefil-i müdde‘î-i mezbûr yedlerinden istîfâ ve kabz ve birbirlerini bizim huzûrumuzda ibrâ eyledikleri üç bin yüz yetmiş beş guruşda dâhildir biz bu husûsa bu vecih üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-i merkūm Avraham zimmî bî-vech mu‘ârazadan men‘ birle mâ-hüve’l-vâki‘ bi’t-taleb ketb olundu. Fi’l-yevmi’s-sâdis min-Saferi’l-hayr li-sene sitte aşere ve mi’e ve elf. Şuhûdü’l-hâl: el-Hâc Mehmed Efendi, İsmail Efendi, Mehmed Emin Efendi, Ahmed Çavuş, el-Hâc Yusuf.