Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 118 Hüküm no: 88 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed oğlu Ataullah’ın terekesinden hisse talebi Vilâyet-i Anadolu’da hâlâ Gedegera kādısı olan Mevlânâ Ebubekir Efendi b. Ahmed b. Veliyüddin nâm kimesnenin imzâ ve hatemini hâvî ve bin yüz on beş senesi Zilhiccesi’nin yirmi yedinci günü târîhiyle müverrah vârid olan kitâb-ı naklin mazmûnu hâlâ Gedegera kazâsına tâbi‘ Adatepe nâm karye sükkânından işbu ashâbü’n-nakl Hasan b. Halil b. Hacı Osman ve Şaban b. İbrahim b. Hacı Osman nâm kimesnelerden vech-i âtî üzere da‘vâ-i sahîha-i şer‘iyye ile mesbûk istişhâd-ı şer‘î sudûrundan sonra udûl-i ahrâr-ı Müslimînden olup yine karye-i mezbûre sâkinlerinden İsa b. Bali b. Ali ve Veli b. Hasan b. Ali nâm kimesneler nakl ü tahvîl için mahâll-i cerh ve ta‘dîle li-ecli’ş-şehâde hâzırân olup isre’l-istişhâd şöyle edâ-i şehâdet-i şer‘iyye eylediler ki, fi’l-asl medîne-i Gedegera kazâsına tâbi‘ Adatepe nâm karye sükkânından olup mahmiye-i İstanbul’da Derviş Ali mahâllesinde tavattun eden Mehmed Efendi’nin oğlu olup bundan akdem fevt olan Ataullah Çelebi’nin muhallefâtı mahmiye-i mezbûrede vâris-i âhar yedinde mazbûta olduğu mesmû‘umuz olmağla merkūm Ataullah Çelebi’nin babası Mehmed Efendi ile müsteşhid-i mezbûrûn Hasan’ın babası Halil ve Şaban’ın babası İbrahim ve Ahmed’in babası Mustafa li-ebeveyn karındaşlar olup babaları ismi mezbûr el-Hâc Osman ve dedeleri ismi Ahmed ve anaları ismi Fâtıma bt. Mustafa ve maskat-ı re’sleri karye-i mezbûredir. Bu vech üzere müsteşhid-i mezbûrûn Hasan ve Şaban ve Ahmed min-ciheti’l-usûbeti’n-nesebiye müteveffâ-yı mezbûr Ataullah Çelebi’nin vârisleridir, hâlâ müteveffâ-yı mezbûr Ataullah Çelebi’nin terekesine vâzı‘ü’l-yed olan âhar vârislerinden ve sâir vâzı‘ü’l-yed olanlardan müsteşhidûn-ı mezbûrûn Hasan ve Şaban ve Ahmed için hisselerini hakk-ı taleb ve da‘vâ ve ahz vardır, bizler bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a oldukdan sonra mezbûr Hasan ve Şaban kendilere bi-tarîkı’l-usûbet isâbet eden hisse-i şâyi‘alarını ahz u kabza ve kendilere îsâle ve kabz ve îsâl mütevakkıf eylediği umûrun küllîsine taraflarından mezbûr Ahmed b. Mustafa’yı vekîl ve nâib-i menâb nasb u ta‘yîn edip ol dahi vekâlet-i mezbûreyi kabûl etdiğini hâvî bulunan kitâb-ı nakl-i mezbûr Ahmed talebiyle mahmiye-i İstanbul’da meclis-i şer‘de müteveffâ-yı mezbûr Ataullah Çelebi’nin terekesine vâzı‘ü’l-yed olan veresesinden li-ebin kız karındaşı Havva nâm hatunun zevci ve tarafından husûs-ı âti’l-beyana vekîl olduğu zât-ı mezbûreyi ma‘rifet-i şer‘iyye ile ârifân Ahmed Ağa b. Mustafa ve Ömer Çelebi b. Osman nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan Mustafa Efendi b. Abdurrahman nâm kimesne mahzarında feth ü kırâet ve istintâk olundukda mezbûr Mustafa Efendi cevâbında müvekkilesi tereke-i müteveffâ-yı mezbûra vâzı‘atü’l-yed olduğunu ikrâr lâkin kitâb-ı mezbûrun Mevlânâ-yı mezbûr kıbelinden vürûdunu inkâr edicek, mezbûr Ahmed’den kitâb-ı mezbûrun mevlânâ-yı mezbûr kıbelinden vürûduna beyyine taleb olundukda kitâb-ı naklin zeylinde olan şuhûd-ı tarîkden Süleyman b. Ali b. Bayram ve Molla Mehmed b. Halil b. Habib nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka işbu kitâb-ı nakil hâlâ Gedegera kādısı olan Mevlânâ Ebubekir b. Ahmed b. Veliyüddin tarafından vârid olup kitâb-ı mezbûru mevlânâ-yı mezbûr bizim muvâcehemizde kırâet ve huzûrumuzda imzâlayıp ve mühürleyüp hat ve hatemine bizi işhâd eyledi, biz kitâb-ı mezbûrun bu vech üzere mevlânâ-yı mezbûr kıbelinden vârid olup zeylinde olan hat ve zahrında olan hatem mevlânâ-yı mezbûrun hat ve hatemi olduğuna şâhidleriz, şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle müteveffâ-yı mezbûrun terekesinden müvekkilân-ı mezbûrân ile müdde‘î-i mezbûr Ahmed’e isâbet eden hisselerini asâleti [19a] ve vekâleti hasebiyle müdde‘î-i mezbûra def‘ ve teslîme vekîl-i mezbûr Mustafa Efendi’ye tenbîh birle mâ-vaka‘a bi’t-taleb ketb olundu. Fi’l-yevmi’s-sâlis min-Saferi’l-hayr li-sene sitte aşere ve mi’e ve elf. Şuhûdü’l-hâl: el-Hâc Mehmed Efendi, İsmail Efendi, Ömer Efendi, Emin Mehmed Efendi, Veliyüddin Efendi.