Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 117 Hüküm no: 87 Orijinal metin no: [18a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tarako v. Kiro’nun menzilini Yani v. Tako’ya satması Mahmiye-i İstanbul’da el-Hâc Muhyiddin mahâllesi sâkinlerinden Tarako v. Kiro nâm zimmî mahmiye-i mezbûrede meclis-i şer‘de işbu râfi‘ü’s-sifr Yani v. Toka nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahâlle-i mezbûrede vâki‘ bir tarafdan Aci Dimitri v. Yuvan nâm zimmî menzili ve bir tarafdan Kasandıra v. Katakoç nâm zimmî menzili ve bir tarafdan ( ) nâm Yahûdî menzili ve bir tarafdan tarîk-i âm ile mahdûd fevkānî yedi bâb odayı ve bir sofayı ve tahtânî ahırı ve bahçeyi ve bi’r-i mâyı müştemil mülk menzilimi bi-cümleti’t-tevâbi‘ ve’l-levâhık [18b] tarafeynden îcâb ve kabûlü hâvî bey‘-i kat‘î ile mezbûr Yani’ye beş yüz guruşa bey‘ ve temlîk ve teslîm, ol dahi ber-vech-i muharrer iştirâ ve temellük ve tesellüm ve kabûl eyledim ba‘dehû semeni olan meblağ-ı mezbûr beş yüz guruşu mezbûr Yani yedinden tamâmen ahz u kabz eyledim. Ba‘de’l-yevm menzil-i mahdûd-ı mezkûr merkūm Yani’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ min-Saferi’l-hayr li-sene sitte aşere ve mi’e ve elf. Şuhûdü’l-hâl: Ahmed Efendi b. Abdullah imam, Ebubekir Çelebi b. İbrahim el-müezzin, Mustafa Çelebi b. Abdullah, Abdurrahman Çelebi b. Süleyman, Mehmed Çelebi b. Mustafa, İsmail b. Mustafa, Ahmed Çelebi b. Mustafa, Papa Kostantino v. Hıristo, Niko v. Todori, Vasil v. Niko, Yani v. Mato, Sogo v. Niyaka?, Yolaki v. Zoko.