Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 117 Hüküm no: 86 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un çiftlik ve tarlalarını satmak üzere Hüseyin Çelebi’yi vekil tayin etmesi Fi’l-asl vilâyet-i Rumeli’nde Kızanlık kazâsına tâbi‘ Hamursuz nâm karyeden olup hâlâ mahmiye-i İstanbul’da Sinanpaşa mahâllesinde sâkine zatını ma‘rifet-i şer‘iyye ile ârifân Mustafa Çavuş b. Mehmed ve Ali b. Abdullah nâm kimesneler ta‘rîfleriyle mu‘arrefe olan Fâtıma bt. Abdullah nâm hatun mahmiye-i mezbûrede meclis-i şer‘-i şerîf-i enverde işbu bâ‘isü’l-kitâb Hüseyin Çelebi b. Abdullah nâm kimesne mahzarında ikrâr ve takrîr-i kelâm edip yedimde mülküm ve hakkım olup zikr olunan Kızanlık kazâsına tâbi‘ mârrü’z-zikr Hamursuz nâm karyede vâki‘ lede’l-ahâlî ve’l-cîrân ma‘lûmü’l-hudûd Çatma odayı ve altı göz anbarı ve çit havluyu müştemil çiftlik ta‘bîr olunur menzilimi semen-i misli ile âhara bey‘a ve çiftlik-i mezbûra teba‘iyetle zirâ‘at ve hırâset olunur taht-ı tasarrufumda olan ma‘lûmü’l-hudûd ve’l-kıt‘a altmış dönüm tarlamı dahi varıp mahâllinde bedeli ile âhara tefvîze ve semeni ile bedelini ahz u kabza ve bana îsâle ve ahz [ve] îsâl mütevakkıf umûrun küllîsine tarafımdan işbu mezbûr Hüseyin Çelebi vekîl ve nâib-i menâb nasb u ta‘yîn eyledim dedikde ol dahi vekâlet-i mezbûreyi kabûl ve merâsimini kemâ-yenbagī edâya ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’s-sâlis min-Saferi’l-hayr li-sene sitte ve aşere ve mi’e ve elf. Şuhûdü’l-hâl: Hüseyin Efendi b. Himmet, İsmail Efendi kâtib, Mehmed Emin Efendi el-kādı, el-Hâc Yusuf b. Osman.