Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 116 Hüküm no: 85 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Mehmed’in Kâtip Hüsrev mahallesindeki menzilini Afife bt. Ali’ye satması Mahmiye-i İstanbul’da Kâtib Hüsrev mahâllesinde sâkine Safiye bt. Mehmed nâm hatun tarafından husûs-ı âti’l-beyana vekîl olduğu zâtını ma‘rifet-i şer‘iyye ile ârifân Mustafa b. ( ) ve Ahmed b. Musa nâm kimesneler şehâdetleriyle şer‘an sâbit olan zevci İmam Mehmed Efendi b. Mustafa mahmiye-i mezbûrede meclis-i şer‘de râfi‘u hâzihi’l-vesîka Afife bt. Ali nâm hatun tarafından husûs-ı âti’l-beyana vekîl-i şer‘îsi olan zevci Mehmed Çelebi b. Ali nâm kimesne mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin zevcem müvekkile-i mezbûrenin yedinde mülkü ve hakkı olup mahâlle-i mezbûrede vâki‘ bir tarafdan Hızır Bey Vakfı olup Bekdaş nâm kimesne tasarrufunda olan vakıf menzil ve bir tarafdan Haremeynü’ş-şerîfeyn Vakfı Âişe nâm hatun tasarrufunda olan vakıf menzil ve bir tarafdan el-Hâc Halil nâm kimesne menzili ve bir tarafdan tarîk-i âm ile mahdûd bir bâb fevkānî ve bir bâb tahtânî odayı ve kârgîr mahzeni ve bi’r-i mâyı müştemil mülk menzilini tarafeynden bi’l-îcâb ve kabûl bey‘-i kat‘î ile müvekkilem mezbûre Safiye ikiyüz yetmiş guruşa mezbûr Mehmed Çelebi’nin zevcesi mezbûre Afife’ye bey‘ ve teslîm ol dahi bi’l-vekâle iştirâ ve tesellüm ve kabûl eyledikden sonra semeni olan meblağ-ı mezbûru yedinden tamâmen ahz u kabz eyledi. Ba‘de’l-yevm menzil-i mahdûd müvekkile-i mezbûre Afife’nin mülk-i müşterâsıdır, keyfe mâ teşâ ve tahtâr mutasarrıfe olsun dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi min-Saferi’l-hayr li-sene sitte aşere ve mi’e ve elf. Şuhûdü’l-hâl: el-Hâc Yahya b. Ahmed, el-Hâc Ali b. Mustafa, Mehmed Çelebi b. Osman, Ebubekir Çelebi b. Ahmed, Molla Ahmed b. Mehmed, Molla Mustafa b. Rıdvan, Mehmed Beşe b. Mustafa, Mehmed b. Mustafa.