Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 115 Hüküm no: 84 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Efendi’nin menzilini müştemilatıyla birlikte Bosnalı Mustafa Efendi’ye satması Mahmiye-i İstanbul’da Fethiye mahâllesi sâkinlerinden olup Haremeyn-i muhteremeyn muhâsebesi kesedarı olan umdetü erbâbi’t-tahrîr ve’l-kalem Hasan Efendi b. el-Hâc Hüseyin b. Ahmed tarafından husûs-ı âti’l-beyana vekîl olduğu Mehmed Çelebi b. Süleyman ve İbrahim Çelebi b. Osman nâm kimesneler şehâdetleriyle şer‘an sâbit olan Ahmed Çelebi b. Abdülfettah nâm kimesne de mahmiye-i mezbûre’de meclis-i şer‘de Rum kuzâtından bâ‘isü hâze’l-kitâb Bosnavî Mustafa Efendi b. Mehmed tarafından husûs-ı âti’l-beyanı tasdîka vekîl olup vekâleti yine şâhidân-ı mezbûrân şehâdetleriyle sâbit olan Ali Efendi b. Süleyman nâm kimesne mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i mezbûrede Fethiye Câmi‘i kurbünde Kâtibmuslihiddin mahâllesinde vâki‘ bir tarafdan Sarrâc Yusuf Beşe mülkü ve bir tarafdan Hayyât Ahmed Bey mülkü ve bir tarafdan ba‘zan tarîk-i âm ve ba‘zan Lütfullah Efendi mülkü ve bir tarafdan tarîk-i hâs ile mahdûd hâriciyesinde iki bâb fevkānî oda ve iki sofa ve tahtında samanlık ve ahır ve kenîf ve bahçeyi ve dâhiliyesinde tabaka-i ulyâda üç bâb oda ve iki sofa ve bir kenîf ve vüstâda bir bâb oda ve bir kilâr ve süflâda bir matbâh ve bir fırın ve fevkānî ve tahtânî kârgîr mahzen ve bi’r-i mâ’ ve havlu ve iki halvetli hamam ve câmekân odası ve eşcâr-ı müsmire ve gayr-ı müsmireli ve bi’r-i mâ’ı muhtevî bahçeyi müştemil mülk menzilini [18a] bi-cümleti’t-tevâbi‘ ve’l-levâhık tarafeynden bi’l-îcâb ve’l-kabûl bey‘-i kat‘î ile müvekkil-i mezbûr Hasan Efendi bin üç yüz guruşa merkūm Bosnavî Mustafa Efendi’ye bey‘ ve temlîk ve teslîm ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr bin üç yüz guruşu müvekkil-i mezbûr Hasan Efendi mezbûr Mustafa Efendi yedinden tamâmen ahz u kabz eyledi. Ba‘de’l-yevm menzil-i mahdûd-ı mezbûr cemî‘ müştemilâtıyla mezbûr Mustafa Efendi’nin mülk-i müşterâ ve hakk-ı sırfı olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-Saferi’l-hayr li-sene sitte aşere ve mi’e ve elf. Şuhûdü’l-hâl: Fahrü’l-müderrisîn Mustafa Efendi, Fahrü’l-kuzât Mehmed Efendi eş-şehrî, Mehmed Efendi Nevâdir Şehrî, Ali Efendi el-kādı, İbrahim Efendi b. Esad, el-Hâc Yusuf b. Mustafa, Salih Efendi b. Selim, el-Hâc Ahmed b. İbrahim.