Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 114 Hüküm no: 83 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe, Emine ve Hatice’nin murislerinden intikal eden menzil ve tarlalardaki hisselerini satmaları Fi’l-asl vilâyet-i Anadolu’da Bolu sancağında Piriştina [Perşembe] kazâsına tâbi‘ Çulbat nâm karye ahâlîsinden olup mahmiye-i İstanbul’da İskenderpaşa mahâllesinde sâkin iken bundan akdem vefât eden Rasul Efendi b. Musa nâm kimesnenin verâseti zevce-i metrûkesi Âişe bt. Hasan nâm hatun ile sulbiye kebîre kızları Emine ve Hadîce nâm hatunlara münhasıra olduğu şer‘an zâhir ve müte‘ayyin oldukdan sonra zâtları ma‘rifet-i şer‘iyye ile ârifân Mehmed Efendi b. Mansur ve Hasan Çelebi b. Mustafa nâm kimesneler ta‘rîfleriyle mu‘arrefe olan mezbûrât Âişe ve Emine ve Hadîce mahmiye-i mezbûrede meclis-i şer‘-i hatîrde müteveffâ-yı mezbûrun er karındaşı kızı olup karye-i mezbûrede sâkine Fâtıma bt. İbrahim nâm hatunun zevci ve tarafından husûs-ı âti’l-beyana vekîl olduğu zât-ı mezbûreyi ma‘rifet-i şer‘iyye ile ârifân mezbûrân Mehmed Efendi ve Hasan Çelebi şehâdetleriyle vekâleti sâbite olan Abdurrahman Beşe b. Osman nâm kimesne mahzarında her biri ikrâr-ı kelâm edip karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd iki bâb tahtânî oda ve bir çatma anbar ve eşcâr-ı müsmire ve gayr-ı müsmireli bahçeyi müştemil menzil ve içinde mevcûde beynimizde ma‘lûm esâs-ı beyt ve evân-ı nühâsiye ve gayr-ı nühâsiye ve hayvânât ve âlât-ı çift mûrisimiz müteveffâ-yı mezbûr Rasul Efendi’nin ile’l-vefât mülkü olup ba‘de-vefâtihî irs-i şer‘le bize isâbet ve intikāl etmekle menzil-i mezbûru ve içinde mevcûde olan eşyâ-yı ve hayvânât ve çift âlâtını bi-cümleti’t-tevâbi‘ ve’l-levâhık tarafeynden bi’l-îcâb ve’l-kabûl bey‘-i kat‘î ile vekîl-i mezbûr Abdurrahman Beşe’ye on beş guruşa bey‘ ve temlîk vekîl-i mezbûr dahi müvekkilesi mezbûre Fâtıma Hatun için bi’l-vekâle iştirâ ve temellük ve kabûl eyledikden sonra semeni olan meblağ-ı mezbûr on beş guruşu bi’l-vekâle bize def‘ ü teslîm biz dahi yedinden tamâmen ahz u kabz edip bi-kadri’l-hısas beynimizde tevzî‘ vü taksîm eyledik ba‘de’l-yevm menzil-i mezbûr ve eşyâ-yı merkūme ve hayvânât ve âlât-ı çift müvekkile-i mezbûreni mülk-i müşterâsı olmuşdur, bizim kat‘â alâka ve medhalimiz kalmamağla mahâllinde kabz ve tasarrufumuzdan [tarafımızdan] müvekkile-i mezbûreyi taslît eyledik dediklerinde gıbbe’t-tasdîki’ş-şer‘î müteveffâ-yı mezbûrun kızları mezbûretân Emine ve Hadîce menzil-i mezbûrda yine vekîl-i mezbûr Abdurrahman Beşe mahzarında her biri ikrâr ve takrîr-i kelâm edip babamız müteveffâ-yı mezbûrun ile’l-vefât taht-ı tasarrufunda olup ba‘de-vefâtihî intikāl-i âdî ile bize intikāl eden yine karye-i mezbûre hudûdu dâhilinde vâki‘ lede’l-ahâlî ve’l-cîrân ma‘lûmü’l-hudûd ve’l-kıt‘a tarlaları dahi bâ-ma‘rifet-i sâhib-i arz müvekile-i mezbûreye meccânen ferâğ ve tefvîz ve mahâllinde kabz ve tasarrufa taslît eylediğimizde vekîl-i mezbûr dahi ber-vech-i muharrer tefevvüz ve kabûl eyledi fîmâ-ba‘d arazi-i mezkûre dahi müvekkile-i mezbûrenin dâhil-i havza-i tasarrufu olmuşdur dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-Saferi’l-hayr li-sene sitte aşere ve mi’e ve elf. Şuhûdü’l-hâl: Emin Mehmed Efendi, Veliyüddin Efendi, Mustafa Efendi, el-Hâc Yusuf, Ahmed Ağa, Hasan Çavuş, Hacı Hasan b. Abdullah İshak Efendi, Berber Salih Çelebi.