Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 113 Hüküm no: 82 Orijinal metin no: [17a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ömer’in varislerinin terekeden hisselerini vasi Ali Çelebi’den teslim almaları Fi’l-asl vilâyet-i Rumeli’nde Mora sancağında Atina kasabası ahâlîsinden olup mahmiye-i İstanbul’da Altıpoğaça mahâllesinde sâkin iken bundan akdem vefât eden Ömer b. Ali b. Mehmed nâm sagīrin verâseti li-ebeveyn kız karındaşı Hadîce nâm hatun ile ammi el-Hâc İbrahim b. Mehmed nâm kimesneye münhasıra olduğu şer‘an zâhir oldukdan sonra mezbûre Hadîce tarafından husûs-ı âti’l-beyana vekîl olduğu alâ nehci’ş-şer‘î sâbit ve sübût-ı vekâletine hükm-i şer‘î lâhık olan zevci Ahmed Çelebi b. Fazlullah nâm kimesne vekâleten ve merkūm el-Hâc İbrahim asâleten mahmiye-i mezbûrede meclis-i şer‘-i enverde müteveffâ-yı mezbûrun kıbel-i şer‘den mansûb vasîsi olmağla terekesine bi’l-vesâye vâzı‘ü’l-yed olan işbu râfi‘ü’l-vesîka Ali Çelebi b. Ramazan nâm kimesne mahzarında her biri ikrâr ve takrîr-i kelâm edip mezbûr Ali mûrisimiz müteveffâ-yı mezbûrun vasîsi olmağla nukūd eşyâsı ber-mûceb-i defter-i kassâm yedinde iken vefât etmekle ba‘de-vefâtihî vasiyy-i mezbûr müteveffâ-yı merkūmun ber-mûceb-i defter-i kassâm yedinde olan muhallefâtından her birimize isâbet ve intikāl eden hisse-i ırsiye-i şer‘iyyemizi vasiyy-i mezbûr bize tamâmen def‘ ü teslîm biz dahi yedinden bi’l-asâle ve bi’l-vekâle ahz u kabz eylediğimizden sonra husûs-ı mezbûra ve gayra müte‘allıka âmme-i da‘vâdan vasiyy-i mezbûrun zimmetini ibrâ ve iskāt eyledik, ba‘de’l-yevm müteveffâ-yı mezbûrun terekesine ve gayra müte‘allıka vechen mine’l-vücûh da‘vâ ve nizâ‘ımız yokdur dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Saferi’l-hayr li-sene sitte aşere ve mi’e ve elf. Şuhûdü’l-hâl: Mustafa b. İsa, el-Hâc Hasan b. Davud, Mehmed b. Davud, el-Hâc Hüseyin b. Hasan, el-Hâc Mustafa b. Abdullah, Abdullah Efendi b. Ali, Molla Mehmed b. Sinan, el-Hâc Yusuf b. ( ) Hüseyin Kethüda b. Ali, Ahmed b. Ömer, Süleyman b. Abdülkadir, İbrahim b. Mustafa.