Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 149 Hüküm no: 92 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in Hızırçavuş mahallesindeki arsasını Mustafa b. Mehmed’e satması Vilâyet-i Anadolu’da Kumla kasabası sâkinelerinden Âişe bt. Mehmed nâm hatun tarafından husûs-ı âti’l-beyana vekîl olduğu zât-ı mezbûreyi ma‘rifet-i şer‘iyye ile ârifân Mehmed Efendi b. Abdullah ve el-Hâc Ali b. Ahmed nâm kimesneler şehâdetleriyle şer‘an sâbit olan Osman b. Mustafa nâm kimesne mahmiye-i İstanbul’da meclis-i şer‘de bâ‘isü’l-vesîka Mustafa b. Mehmed mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilem mezbûrenin yedinde mülk ve hakkı olup mahmiye-i mezbûre Hızırçavuş mahâllesinde vâki‘ bir tarafdan mahâlle-i mezbûre mescidi ve bir tarafdan Mehmed Efendi nâm kimesne mülkü ve bir tarafdan mahâlle-i mezbûrede imam olanlara meşrûta menzil ve taraf-ı râbii tarîk-i âm ile mahdûd bi-hesâb-ı terbî‘î üç yüz kırk yedi zirâ‘ arsa-i hâliyesini tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile merkūm Mustafa’ya seksen guru[şa] bey‘ ve teslîm ol dahi ber-vech-i muharrer [25b] iştirâ ve tesellüm ve kabûl eyledikden sonra semeni olan meblağ-ı mezbûr yüz seksen guruşu müşterî-i merkūm bana def‘ ü teslîm ben dahi vekâletim hasebiyle yedinden tamâmen ahz u kabz eyledim. Ba‘de’l-yevm mârrü’z-zikr arsa merkūm Mustafa’nın mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-Saferi’l-hayr li-sene sitte aşere ve mi’e ba‘de’l-elf. Şuhûdü’l-hâl: İbrahim Efendi el-imâm, Ahmed Efendi el-müezzin, Mehmed Çavuş b. Abdurrahman, İsmail Beşe b. Abdullah, el-Hâc Yusuf b. Osman