Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 150 Hüküm no: 93 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Mustafa’nın, eşi Mustafa Ağa’dan muhalaa usulüyle boşanması Mahmiye-i İstanbul’da Akseki mahâllesinde sâkine olup zâtı Mustafa Çelebi b. Hasan ve Mehmed Çavuş b. Mustafa nâm kimesneler ta‘rîfleriyle mu‘arrefe olan Havva bt. Mustafa nâm hatun mahmiye-i mezbûrede meclis-i şer‘de zevc-i muhâlı‘ı işbu râfi‘ü’l-vesîka Mustafa Ağa b. Ali nâm kimesne mahzarında ikrâr ve takrîr-i kelâm edip mezbûr Mustafa Ağa zevcim olup beynimizde hüsn-i zindegânemiz olmamağla bedel-i hul‘ olmak üzere kendüye medfû‘um olan on guruş ve birer kat câmeşûy ve bir yorgan ile zimmetinde mütekarrir ve ma‘kūdün-aleyh olan iki yüz guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mustafa Ağa’nın firâşından hâsıl ve benden mütevellid sulbî oğulları Ali ve Mehmed nâm sagīrleri yedi yaşlarına değin kendi malımdan infâk ve iksâ etmek üzere mezbûr Mustafa Ağa ile muhâla‘a-i sahîha-i şer‘iyye ile hul‘ olup ol dahi hul‘-ı mezbûru ba‘de’l-kabûl bundan akdem mezbûr Mustafa Ağa malımdan kırk guruş kıymetli bir çift altın bileziğim ile yirmi guruş kıymetli bir takım altın düğmemi ve bir çift zümrüd küpe ile ikisi yirmi beş guruş kıymetli bir zümrüd yüzüğümü ve beş guruş kıymetli bir yakut hatemim ve iki yüz yirmi guruş kıymetli bir incili serpûşumu ve otuz guruş kıymetli iki sîm gülâbdân ve buhurdanımı ve üç yüz guruş kıymetli beş aded zümrüd taşlı kuşağımı ve on beş guruş kıymetli bir sofralık bakır evânımı ve iki yüz guruş kıymetli bir re’s câriyemi ahz ve âhara bey‘ ile istihlâk etmekle bi’l-cümle mârrü’z-zikr eşyâlara ve hukūk-ı zevciyete ve gayra müte‘allıka âmme-i de‘âvî ve mutâlebâtdan zevcim mezbûr Mustafa Ağa’nın zimmetini ibrâ-i âm ile ibrâ ve iskāt eyledim dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 5 min-Saferi’l-hayr sene 1116 Şuhûdü’l-hâl: Ekmekçibaşı el-Hâc Hüseyin Ağa b. Zülfikar, Mehmed Çavuş b. Mustafa, Mustafa Ağa b. Mehmed, Derviş Mehmed b. Selim, Mustafa Çelebi b. Hasan, İbrahim b. Mehmed, Halil Beşe b. İbrahim.