Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 150 Hüküm no: 94 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi’nin ev satışı hususunda aldatıldığına dair Londari aleyhindeki davasının reddedilmesi Mahmiye-i İstanbul’da Edirnekapısı dâhilinde Alipaşa-i atik mahâllesinde sâkin Yorgi v. Papa Yani nâm zimmî mahmiye-i mezbûrede meclis-i şer‘-i hatîr-i lâzımü’t-tevkīrde yine mahâlle-i mezbûre sâkinlerinden işbu râfi‘ü’s-sifr Londari v. Nikola nâm zimmî muvâcehesinde üzerine da‘vâ ve takrîr-i kelâm edip bundan akdem yedimde mülküm ve hakkım olup mahâlle-i mezbûrede vâki‘ bir tarafdan Kokona bt. Todori nâm Nasrâniye mülkü ve bir tarafdan Makos nâm Ermeni mülkü ve bir tarafdan tarîk-i âm ile mahdûd fevkānî ve tahtânî odaları ve dehlizi ve tahta-bend ve bi’r-i mâ ve cüneyne ve kenîf ve havluyu müştemil olan menzilimi bey‘ eder olduğum hâlde ikiyüz guruşdan ziyâde değmez deyü mezbûr Londari beni tağrîr ve değerinden noksân-ı fâhiş ile menzil-i mezbûru iki yüz guruşa benden iştirâ ve bana def‘-i semen etmişidi. Lâkin menzil-i mezbûrun hîn-i bey‘de değeri ikiyüz elli guruş olup bu vech üzere bey‘-i mezbûrda tağrîr ve gabn-i fâhiş olmağın mezbûr Londari’ye suâl olunup mûceb-i şer‘îsi icrâ olunmak matlûbumdur dedikde gıbbe’s-suâl mezbûr Londari cevâbında menzil-i mezbûru müdde‘î-i mezbûra bey‘a arz eyledikde menzil-i mezbûrun ancak değeri iki yüz guruş olup ziyâdeye tahammülü olmamağla bu vech üzere akd-i mezbûrda tağrîr ve gabn olmadığından mâ‘adâ müdde‘î-i mezbûr menzil-i mezbûru bana şuhûd mahzarında iki yüz guruşa bey‘ ve kabz-ı semen eylediğinden mâ‘adâ menzil-i mezbûra müte‘allıka âmme-i de‘âvî ve mutâlebâtdan zimmetimi ibrâ ve iskāt eyledi deyip akd-i mezbûr tağrîr ve gabn-i fâhiş ile olduğunu inkâr edip müdde‘î-i mezbûru def‘le mukābele edicek müdde‘î-i mezbûrun tağrîr ve gabn-i fâhiş olduğuna beyyinesi olmamağla mezbûr Londari’den def‘-i mezbûruna beyyine taleb olundukda zikr olunan Alipaşa-i atik mahâllesi ahâlîsinden Mihayel v. Yorgo ve Apostol v. Yani ve Minol v. Yorgi ve Foti v. Vasil ve Papa Panayot v. Yani nâm zimmîler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka akd-i mezbûrda tağrîr ve gabn-i fâhiş olmadığından mâ‘adâ [26a] ancak menzil-i mezbûrun değer bahası iki yüz guruş olmağla müdde‘î-i mezbûr bizim huzûrumuzda menzil-i mahdûd-ı mezkûru mezbûr Londari’ye iki yüz guruşa bey‘ ve kabz-ı semen edip menzil-i mezbûra müte‘allıka âmme-i da‘vâdan mezbûr Londari’nin zimmetini ibrâ ve iskāt eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-i mezbûr bî-vech mu‘âraza’dan men‘ birle mâ-vaka‘a bi’t-taleb ketb olundu. Fi’l-yevmi’s-sâbi‘ min-Saferi’l-hayr li-sene sitte aşere ve mi’e ve elf. Şuhûdü’l-hal: el-Hâc Mehmed Efendi el-kâtib, İsmail Efendi el-kâtib, Veliyüddin Efendi el-kâtib, Yusuf b. Abdullah.