Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 184 Hüküm no: 121 Orijinal metin no: [38a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurşunlu Han’da ikamet eden Kalinos v. Sanya’yı Hasan b. Hüseyin’in bıçak ile yaraladığı Mahmiye-i İstanbul’da Darbhâne kurbünde Kurşunlu Han’da müsâfiren sâkin mecrûh olduğu [lede]’ş-şer‘ müşâhede olunan rençber tâifesinden işbu bâ‘isü’s-sifr Kalinos v. Sanya nâm zimmî mahmiye-i mezbûrede meclis-i şer‘-i hatîrde Hasan b. Hüseyin nâm kimesne <> mahzarında üzerine da‘vâ ve takrîr-i kelâm edip mezbûr Hasan târîh-i kitâbdan üç gün mukaddem Pazartesi gecesi akşam namazı vaktinde han-ı mezbûrda es-Seyyid Hüseyin b. Osman nâm kimesnenin odası önünde sol tarafımın boş böğrüne bir kara saplı hançer ile beni darb ve mecrûh etmişdir, suâl olunup mûcib-i şer‘îsi icrâ olunmak matlûbumdur dedikde, gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i Müslimînden olup han-ı mezbûrda müsâfiren sâkin Ali b. İbrahim ve Mehmed b. Mustafa nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka işbu mezbûr Hasan târîh-i kitâbdan üç gün mukaddem [38b] han-ı mezkûrda merkūm es-Seyyid Hüseyin’in odası önünde akşam namazı vaktinde bizim huzûrumuzda müdde‘î-i mezbûrun sol boş böğrüne bir kara saplı hançer ile darb ve mecrûh eyledi, biz bu husûsa bu vech üzere şâhidleriz şehâdet dahi ederiz deyü her biri şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fi’s-sânî ve’l-ışrîn min-Saferi’l-hayr sene 1116. Şuhûdü’l-hâl: el-Hâc Mehmed Efendi kâtib, İsmail Efendi kâtib, Ömer Efendi kâtib, Emin Mehmed Efendi kâtib, el-Hâc Yusuf muhzır.