Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 183 Hüküm no: 120 Orijinal metin no: [38a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’nın Mardıros’da olan alacağını kefilinden tahsil etmesi Mahmiye-i İstanbul’da Samatya kapısı kurbünde Zeytin mahâllesinde sâkin Hasan Ağa b. Abdullah nâm kimesne mahmiye-i mezbûrede meclis-i şer‘de işbu bâ‘isü’s-sifr Bogos v. Toros nâm zimmî muvâcehesinde ikrâr ve takrîr-i kelâm edip mezbûr Bogos’un li-ebeveyn karındaşı gāib ani’l-meclis Mardıros nâm zimmî zimmetinde cihet-i deyn-i şer‘îden yüz guruşum olup meblağ-ı mezbûre merkūm Bogos ile gāibân ani’l-meclis medyûn-ı mezbûr Mardıros’un vâlidesi Kanaze bt. Ağnam nâm Nasrâniye ile Baryam v. Barnik nâm zimmîden her biri emr u kabûlü hâviye kefâlet-i tâmme ile bundan akdem kefil olduklarından sonra medyûn-ı mezbûr Mardıros’a zafer bulup meblağ-ı mezbûr yüz guruşu kendiden ahz u kabz etmek mümkün olmamağla meblağ-ı mezbûru kefâletine binâen merkūm Bogos’dan taleb eylediğimde ol dahi kefâletini ikrâr ve bi-hasebi’l-kefâle meblağ-ı mezbûr yüz guruşu merkūm Bogos bana edâ ve teslîm, ben dahi tamâmen ahz u kabz eyledim. Ba‘de’l-yevm medyûn-ı mezbûr Mardıros’da ve küfelâsı mezbûr Bogos ve gāibân ani’l-meclis vâlidesi Kanaze nâm Nasrâniye ve Baryam nâm zimmîler zimmetlerinde bir akçe ve bir habbe hakkım kalmadı dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Saferi’l-hayr li-sene sitte aşere ve mi’e ve elf. Şuhûdü’l-hâl: Hüseyin Bey kasab, Seyyid Mustafa kasab, Selim Beşe kasab, İbrahim Beşe manav, el-Hâc Yusuf muhzır.